Тоқаев алдағы Құрылтай алдына міндеттер қойды

Президент Қасым-Жомарт Тоқаев алдағы Құрылтай шешуі тиіс міндеттерді атап өтті. Бұл туралы Мемлекет басшысы Парламент палаталарының бірлескен отырысында мәлімдеді, - деп хабарлайды Tengrinews.kz.

Президент Қасым-Жомарт Тоқаев алдағы Құрылтай шешуі тиіс міндеттерді атап өтті. Бұл туралы Мемлекет басшысы Парламент палаталарының бірлескен отырысында мәлімдеді, - деп хабарлайды Tengrinews.kz.

Президенттің айтуынша, депутаттар корпусы саяси және азаматтық жауапкершілік танытып, парламенттік реформаларға қолдау білдірді.

"Осында отырған біраз депутат Конституциялық комиссия құрамында болды. Сіздер азаматтармен кездесіп, мемлекетіміздің тұрпатын өзгертетін, экономикалық әлеуетін күшейтетін реформалардың мән-маңызын жұртшылыққа жан-жақты түсіндіріп бердіңіздер", - деді Тоқаев.

Мемлекет басшысы жалпыхалықтық референдумда Ата заңымыз қабылданған соң мемлекетіміздің құқықтық жүйесін жедел әрі сапалы жаңарту жұмысы жүргізілгенін атап өтті.

"Өте қысқа мерзімде еліміздің заңнамасын жаңа Конституция нормаларына сай өзгерту жұмысын атқардыңыздар. Атап айтқанда, Парламент 9 заң топтамасын, соның ішінде 6 конституциялық заңды шұғыл әзірлеп, қабылдады", - деді Президент.

Тоқаев нәтижесінде мемлекеттік биліктің "Күшті Президент – ықпалды Құрылтай – есеп беретін Үкімет" деген базалық формуласы толыққанды институционалдық мәнге ие болғанын қадап айтты.

"Жаңарған билік тармақтарының теңгерімді жүйесінде Президент Тәуелсіздік пен мемлекет тұтастығының символы, Конституцияны және азаматтардың заңды құқықтары мен бостандықтарын сақтаудың кепілі ретінде бұрынғыдай басты рөл атқарады", - деді Мемлекет басшысы.

Сонымен қатар Тоқаев Қазақстанның президенттік республика болып қала беретінін баса айтты. Оның сөзінше, мұны түсіну, ескеру өте маңызды. Яғни Президент – мемлекеттің ең жоғары лауазымды тұлғасы, Қарулы күштердің Жоғарғы Бас қолбасшысы, барлық құқық қорғау органдарының басшыларын тағайындайды, елдің ішкі және сыртқы саясатының негізгі бағыттарын айқындайды, Қазақстан атынан халықаралық аренада өкілдік етеді.

Бұған қоса, Тоқаевтың айтуынша, жаңғырту жұмыстары парламенттік жүйені одан әрі трансформациялау тетіктерін де қарастырады.

"Құрылтайдың алдында барлық бюрократиялық рәсім түріндегі кедергілерді жою, заң шығару ісінің жеделдігі мен сапасын арттыру, білікті сарапшылардың және консультанттардың қызметін тиімді ұйымдастыру міндеті тұр", - деді Тоқаев.

Сондай-ақ Мемлекет басшысы жаппай цифрландыру және жасанды интеллект дәуірінде Құрылтайға ұлттық заңнаманы тез өзгеріп жатқан цифрлық матрица жағдайына шұғыл бейімдеу үшін қарқынды жұмыс істеуге тура келетінін мәлімдеді.

"Бұл – өте маңызды. Қазақстанның жаһандық бәсекеге қаншалықты дайын екені осыдан көрінеді", - деп түйіндеді Президент.

Бұған дейін Тоқаев Қазақстандағы мемлекеттік билік формуласы "күшті Президент - ықпалды Парламент - есеп беретін Үкімет" деп аталатынын айтқан болатын.

Кейінірек Қазақстанда Парламенттің атауын Құрылтай деп өзгерту ұсынылды. Бұл туралы жаңа Конституция жобасын талқылау кезінде хабарланған болатын. 15 наурызда Қазақстанда жаңа Конституция бойынша референдум өтті. Ресми мәліметтерге сәйкес, дауыс беруге қатысқандардың басым көпшілігі конституциялық реформаны қолдаған.

Google News арқылы жаңалықтарымызды қадағалаңыз