Тоқаев Кения президентін Тәуелсіздік сарайында қарсы алды

АСТАНА, 20 мамыр – Sputnik. Мемлекет басшысы Қасым-Жомарт Тоқаев Қазақстанға мемлекеттік сапармен келген Кения президенті Уильям Рутоны салтанатты түрде қарсы алды, деп хабарлайды Sputnik Қазақстан тілшісі.

Тоқаев мәртебелі мейманды Тәуелсіздік сарайының кіреберісінен күтіп алды. Одан кейін екі елдің басшысы үлкен залға өтіп, бір-біріне өз делегацияларын таныстырды. Сол жерде құрметті қарауыл сап түзеді. Ал президенттік оркестр Кения мен Қазақстанның әнұрандарын орындады.

Тәуелсіздік сарайында өтетін келіссөздер кезінде Тоқаев пен Руто сауда-экономикалық және мәдени-гуманитарлық ынтымақтастығын дамыту жайын талқылайды. Одан кейін бірқатар құжатқа қол қойылады.

Екі елдің экономикалық ынтымақтастығы

2024 жылы Қазақстан мен Кения арасындағы тауар айналымы 42,4 млн АҚШ доллар болған. Ал 2025 жылы бұл көрсеткіш 52,21 млн долларға (экспорт – 1 мың доллар, импорт – 52,2 млн доллар) жеткен.

Қазақстан Кенияға күкірт, электрлік шамалар мен сәулеленуді өлшеуге арналған аппаратураларды, автоматты реттеу мен басқару аспаптарын экспорттайды. Ал Кениядан шай, кесілген гүлдер мен гүл бүршіктерін, сондай-ақ зімбір, шафран, куркума, жөке, лавр жапырағы және басқа да дәмдеуіштерді импорттайды.

2025 жылы Кения астанасы - Найроби қаласында Қазақстан елшілігі ашылған болатын. Ал 2026 жылы ақпан айында алғаш рет Қазақстан-Кения бизнес форумы ұйымдастырылды.