Тоқаевтың ұшағы Ресей үстінде жоғалып кетті : Президент ұшағы неге көрінбей қалды?

Журналист Манас Қайыртайұлы әлеуметтік желідегі парақшасында Қазақстан Президентіне тиесілі деп саналатын ұшақтың онлайн әуе карталарында уақытша көрінбей қалғанына қатысты жазба жариялады, деп Arasha.kz тілшісі Malim.kz сайтына сілтеме жасап хабарлайды.

Журналистің мәліметінше, әуе кемесі Қостанай өңірінің үстімен өтіп, Ресей аумағына бет алған сәттен кейін онлайн әуе қозғалысын бақылайтын сервистерде белгісіз жағдай тіркелген.

"Қазақстан президентінің ұшағы бірер сағат бұрын Қостанайдың үстінен Ресей аумағына қарай өтті. Ары қарай транспондері ажырады ма, ұшақтың онлайн локациясы бір орында тұрып қалды", – деп жазды Манас Қайыртайұлы.

Айта кетейік, бүгін Давос қаласында Мемлекет басшысы Қасым-Жомарт Тоқаев пен АҚШ президенті Дональд Трамп арасында кездесу жоспарланған.

Кейін журналист ақпаратты толықтырып, президент мінген ұшақтың Давостан шамамен 300 шақырым қашықтықта орналасқан Штутгарт әуежайына қонғанын жазды.

"Ақорда ертең Давоста Тоқаев пен Трамп кездесетінін жазған. Түнде Трамптың ұшағынан ақау шығып, басқасына мініп, қайта ұшқан екен", – деді ол.

Сонымен қатар ашық дереккөздерде Дональд Трамп мінген ұшақта түнгі уақытта техникалық ақау тіркеліп, кейін басқа әуе кемесіне ауысқаны жөнінде де ақпарат тараған. Алайда бұл мәліметтерге қатысты тараптар әзірге ресми түсініктеме берген жоқ.