Тотықұс асырағанның ұпайы түгел

Qazaq24.com, Egemen.KZ дереккөзінен алынған мәліметтерге сүйене отырып ақпарат жариялайды..

Тараз қаласының тұрғыны тропикалық тотықұстарды өсіріп, табыс көзіне айналдырып отыр. Былтыр қайтарымсыз грантқа қолы жеткен Нұржан Нұрмаханұлы құс шаруашылығын дамытуға айрықша ден қойып жүр. Өңірде алғаш боп тотықұс өсіруді қолға алған азаматтың жаңа қадамына қызығушылар аз емес.

Тараздық Нұржан Нұрмаханұлының өткен жылы шілдеде шағын кәсіп ашып, нәсібін айыруға деген құлшынысы арта түскен. Құс шаруашылығын өркендетуге ден қойған ол арнайы жоба жасап, құзырлы мекемелерге ат басын бұрыпты. Тотықұс өсіремін деп талап қылған 37 жастағы азматтың айрықша жобасы комиссия тарапынан мақұлданып, нәтижесінде 1,5 млн теңге шамасында грант иегері атанады. Қазір оның иелігіндегі тотықұстың саны 200-ден асыпты.

Деректерге жүгінсек, тотықұстардың ең кішкентайлары 15-25 жыл аралығында өмір сүретін көрінеді. Әйтсе де, олардың ірілері бір ғасыр жасайды деседі. Ал төрткүл дүниедегі ең жады мықты тотықұс шамамен 400-ге жуық сөз жаттап алған көрінеді.

Осындай сан түрлі дерек тараздық азаматтың тың кәсіпті қолға алуына себеп болса керек. Қазір африкалық тотықұстарды асырап отырған Нұржанның құс кепесінде Амадина, Розелла, Пенанта, Корелла секілді тропикалық тіршілік иелерінің он шақты түрі бар. Нұржанның айтуынша оларды күтіп-баптаудың мехнатынан, рахаты көп. Өйткені ол бұл жұмысты жанындай жақсы көріп істейді.

«Қолға алған жобамды жан-жақты зерделеген комиссия төрағасы бастаған азаматтар идеямды айрықша деп бағалапты. Ол кісілердің мұндай сөзі мені шабыттандырды десем, артық айтқандық болмас. Жалпы, құс өсіру – сүйікті ісім. Ал сүйікті шаруаң қосымша табыс көзіне айналып жатса, оның несі айып? Кепедегі құстарға жемін беру, суын беру, астын тазалау секілді кішігірім жұмыстың ешқандай қиындығы жоқ. Қайта сол арқылы табиғаттың айрықша жаратылысы мен адам арасындағы байланыс түзеле түседі деп пайымдаймын. Бір сөзбен айтқанда, қолға алған бастамамды жақсы көремін. Құстардың әр қимылы көзге ерекше көрінеді», дейді кәсіпкер.

Мамандар келтірген дерекке сенсек, тотықұстар ырғақты айрықша сезіне алады екен. Содан да болар, делебесін қоздыратын музыкаға билей жөнеледі. Ал Аустралияда тотықұстарды сөйлеуге үйрететін арнайы мектептер бар. Бәлкім, мұндай мекемелер болашақта біздің елде де ашылатын шығар. Кім білсін...

Нұржан Нұрмаханұлы асырап отырған тропикалық тіршілік иелері тазалыққа айрықша назар аударатын көрінеді. Олар өздеріне жайлы атмосферада ғана қанат қағады. Ал кәсіпкердің бұл істі қолға алуына имек тұмсықты құстардың тез көбейетіні түрткі болған көрінеді. Айтуынша, жылына үш рет балапан басады екен. Жұмыртқаны жарып шыққан кореллалардың дені екі айдың бедерінде кәдімгі тотықұсқа айналып шыға келеді. Бір сөзбен айтқанда, жылдам өседі.

Кәсіпкердің айтуынша, кепедегі құстар дәл қазір балапан басып жатыр екен. Ерте көктемде тотықұс саудасы қыза түсетін түрі бар. Нұржан әр құсты 2 мың мен 60 мың теңге аралығында саудалауға бел буып отыр. Осылайша, кіріс көзін арттырмақ. Өткен жылы Тараз шаһарында жалпы саны 215 азамат жаңа жобасын сәтімен қорғап, 400 АЕК шамасында грантқа ие болыпты.

Тараз қалалық мансап орталығындағы мамандардың айтуынша, жаңашыл бағыттағы азаматтарды қолдау жұмысы алдағы уақытта да жалғасады. Өйткені жаңашыл бағыттағы азаматтар тарапынан сұраныс жеткілікті. Осы жылы қайтарымсыз грант сомасы 1 млн 700 мың теңге шамасында болмақ. Ал бұл грант жеті санаттағы азаматтарға беріледі. Олардың қатарында атаулы әлеуметтік көмек алатын тұрғындар да бар екен.

Жалпы, қайтарымсыз гранттың шарапатын көрген азаматтардың саны жыл өткен сайын артуы көңіл қуантады. Жаңа іске бел буғандардың дені тың жобалармен келіп, комиссия мүшелерін таңдандырып жүр екен. Мұның өзі кәсіп бастаймын деген тұрғындардың арасында ізденіс ізіне түскендердің көп екенін аңғартса керек.

Тараз

Соңғы жаңалықтар