Тараз тұрғыны тотықұс өсіруден табыс тауып отыр

Qazaq24.com, 24.KZ дереккөзінен алынған ақпаратқа сүйене отырып мәлімет бөліседі..

Тараз тұрғыны тотықұс өсіріп табыс тауып отыр.

Нұржан Нұрмаханұлы қазір тропикалық құстың санын 200-ден асырған. Ол бұл бизнесін бастау үшін былтыр мемлекеттік грант алыпты. Сөйтіп, аймақта бұрын-соңды болмаған кәсіп түрін ашқан.

Нұржан Нұрмаханұлының құс шаруашылығын қолға алуына әкесі сеп болған. Бала кезден әкесінің құс асырағанын көріп, өзі де тотықұстың бабын таба бастапты. Сөйтіп, 15 шақты тропикалық қанаттыны қолға үйреткен. Былтыр жоба жасап, онысын мансап орталығына өткізеді. Онысы қолдау тауып, мемлекеттен 1,5 млн теңге грант ұтып алды.

Мерей Бает, тілші:

- Мұндағы торларда 200 ден аса тотықұс бар. Оларды өсіру үшін құсхана ішінің температурасы қысы-жазы 18-20 градус болуы тиіс. Сонда ғана күтімі жақсы құс бір жылда 3 рет балапан баса алады.

Кәсіпкер қазір тотықұстың түрін 10-ға жеткізген. Арасында корелла, амадина, роззела мен пенанта секілді тұқымдар бар. Тазалықты сүйетін құстың әрқайсысына әртүрлі күтім қажет. Мәселен, кіші тұқымдысы 12-күнде балапан шығарса, сол балапанның өзі 45 күннен соң жұмыртқалайтын жағдайға жетеді. Ал үлкені 20 күнде жұмыртқа жарғанымен, жұмыртқа басу үшін 2-3 жыл уақыт керек. Қазір қос қанаттыларға Тараздан өзге Шымкент, Алматы қалаларынан сұраныс көп.

Нұржан Нұрмаханұлы, жеке кәсіпкер:

- Барлығы үйлеріне алғысы келеді. Үйіне эстетика үшін қойғысы келеді. Үйдің көркін ашады. Балалар гаджеттен кішкене босап, жан-жануарлармен әлек болып, оның астын тазалап, кішкене жақсы қасиеттерді бойына сіңіріп өседі. Сол негізгі мақсатым.

Былтыр қалада Нұржан секілді 215 тұрғын қайтарымсыз қаржы алған. Грант ұтқандардың қатарында қоян өсіру, кондитерлік және тігін цехы мен мал шаруашылығы кәсібін ашқандар бар.

Ерғали Кембаев, қалалық мансап орталығының директоры:

- 7 санаттағы азаматтарға бекітіледі. Яғни оны толыққанды айитып өтетін болсақ; көпбалалы аналар, көпбалалы әкелер сол кісілер, асыраушысынан айырылған азаматтарға, қандастарға, содан кейін АӘК алушыларға беріледі. Грантқа өтінім береді бизнес планын көрсетіп, бізде тәуелсіз комиссия жыл сайын құрамы өзгеріп, тәуелсіз комиссияның жауабымен алады грантты.

Биыл өз кәсібін ашуға ниетті жандарға 1 млн 700 мың теңге көлемінде бөлу қарастырылып отыр. Қолдау тапқан 220 жобаның иесіне қаражат мамыр айында берілмек.

Мерей Бает, Тимур Сейілхан, Елдар Байділдә

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.