Жамбыл облысында ауыл тұрғыны күн сәулесін табыс көзіне айналдырып отыр

Жамбыл облысында ауыл тұрғыны ерекше кәсіп жасап, күн сәулесін табыс көзіне айналдырып отыр. Жуалы ауданының тұрғыны Елужан Момышев ауласына 100 күн панельді орналастырып, одан алған электр энергиясын ауылдастарына таратуда. Айта кетерлігі тұрғын кәсіптің бұл түрін облыста алғаш болып бастап отыр. 

Мерей Бает, тілші:

- Күннің көзін табыс көзіне айналдырған тұрғын Көлбастау ауылында тұрады. Ол бұл ісін көктемде бастаған. Алғашында Қытайдан күн панельдерін алдырып, бағанасын берік етіп терең орнатқан. Жабдықтардың найзағайға қарсы жүйесі де бар.

Елужан Момышев электр қуатын мамыр айынан бастап өндіріп жатыр. Ерте көктемде күн панельдерін сатып алып, оған қажетті жаңа желі мен есептеуіш құралдарын да орнатқан. Өндірілген электр энергиясын онлайн бақылауға болады. Қазір ауладағы станцияның қуаты сағатына 50 киловаттқа жеткен. «Жалпы жабдықтың бәрін жинақтауға 10 миллион теңге жұмсадым», - дейді тұрғын. 

Елужан Момышев, Көлбастау ауылының тұрғыны:

- Президентіміз мынау жасыл энергетиканы дамыту керек деді. Соған осы ауылда отырып өз үлесімді қосып жатырмын. Мынау қазір 100 панель қойдым, 50 киловатт. Құдай қаласа тағы 200 панель қойсам ба деген үміт бар. Бұл жыл мезгіліне қарамайды. Күн сәулесі түссе болды, өзі тагын шығара береді.

Жәнібек Мырзалиев, Мыңбұлақ ауылдық округінің әкімі:

- Ауылдық округімізде жалпы кәсіпкерлік нысандардың басым көпшілігі егін мал шаруашылығы. Момышев - бүгінгі таңда облыс бойынша кәсіп жасап отырған азаматтардың ішіндегі күн элект энергиясын өндіру бойынша алғашқы тіркелген жоба болып отыр. Осы үшін ауыл тұрғындары мақтан тұтады.

Ауыл тұрғыны бүгінге дейін 70 мың киловатт электр энергиясын өндірген. Онысын көше басындағы трансформаторға береді. Одан ауылдастары жарық алып отыр. Ал кәсіпкердің сатқан электр қуатына «Жамбыл электр желілері» мекемесі тарифіне қарай қаражат төлеуде. Жалпы Жамбыл облысы жаңартылған энергия көзін өндіру бойынша республикада үздік үштіктің қатарында. Аймақта жалпы қуаты 571 МВ-ттық 22 нысан жұмыс істейді. Оның 10-ы жел электр станциясы болса, 6 су және сонша күн электр станциясы бар. 

Алмас Омаров, Облыстық энергетика және ТКШ басқармасының бас маманы:

- Соңғы төрт жылдың ішінде кіші және үлкен қуаттағы жобалар іске асырылған. Оның бірі 2021 жылы Сарысу ауданында Шоқпар жел электр станциясы қуаты 100 мегаватты құрайтын. Сонымен қатар бүгінгі таңда облысымызда екі ірі жоба іске асырылу көзделіп отыр. Ол - 1 Гегаватты құрайтын жел электр станциясы. Мойынқұм ауданында және Талас пен Сарысу аудандарында 1 гегаватты құрайтын мпздар компаниясы тарапынан жел электр станциясы жобаларын іске асыру көзделіп отыр.

Энергетиктердің мәліметінше, 2028 жылға қарай аймақтағы жаңартылатын энергия өндіретін нысандар қуаты 2,5 гигаваттқа жетеді. Бұл облыс тұрғындары тұтынантын электр қуатының 60 проценті болмақ. 

Авторлары: Мерей Бает, Елдар Байділдә