Атырау облысында үш ауыл су тапшылығымен күресіп отыр

Атырау облысы Қызылқоға ауданындағы Миялы, Жангелдин, Жасқайрат ауылдарын сумен қамтып келген "Қарасу" жерасты су қоры азайып келеді. 

Одан кейін үш ауыл құрғашылықтың зардабын тарта ма? 

Аудандық ТҮКШ бөлімінің басшысы Ерсағын Құмаровтың айтуынша, Миялы-Жангелдин-Жасқайрат топтық су құбырының құрылысы 2004-2006 жылдары жүргізілген болатын. Магистралды су құбырының ұзындығы 32, 9 шақырым. Судың бастауы Қарасу жерасты су қорынан бөлінеді, 2006 жылы төрт дана ұңғыма қазылып, су құбыры іске қосылған.

Алайда бірнеше жылдан кейін су қоры жетпей қалды. Су жетпестігіне байланысты 2020 жылы аудандық әкімшілік демеушілік ұйымдастырып, "Атыраугидрогеология" ЖШС-мен 5 дана ұңғыма қазылып, 2021 жылы іске қосылды. Осылайша барлығы 11 дана ұңғыманың арқасында ауыз су мәселесі шешілген болатын. Бірақ 2024 жылғы су тасқыны салдарынан ұңғымаларды су шайып кетіп ұңғымалар құмығып, аталған үш ауылда ауыз су проблемасы қайта туындады. Қарасу жерасты су қорынан "ЕмбіМұнайГаз" АҚ-ның демеушілігімен қосымша 3 дана ұңғыма қазылып, барлығы 14 дана ұңғыма жұмыс жасап тұр. 

Дегенмен, Құмаровтың айтуынша, алаңдаушылықтар әлі де сақталуда:

- ҚР Индустрия және инфрақұрылымдық даму Министрлігі геология және жер қойнауын пайдалану комитетінің 2011 жылғы номер1145-11-У хаттамасында көрсетілген мәліметтерге сәйкес, Қарасу жерасты су қоры айтарлықтай азайған. Аталған жерасты су қорынан 365 м/куб су алу жоспарланса қазіргі уақытта 1500 куб/м су алынып отыр.  1969 жылы су қоры 10 км2 аумақты қамтыса, 2011 жылы бұл көлем небәрі 2,75 км2 деңгейінде қалған. Ал су көзі тәулігіне 345, 5 метр3 көлемде ғана су беруге есептелген және оның пайдалану мерзімі 2026 жылға дейін шектелген.

Осыған байланысты тұрғындарды ауыз сумен үздіксіз қамтамасыз етуде орын алған мәселені түбегейлі шешу үшін Тайсойған жерасты су қорынан су алу мақсатында жалпы ұзындығы 72 шақырым болатын "Тайсойғвн-Миялы" магистралды су құбыры тартылуда. Құрылыс жұмыстары 2026 жылы аяқталады деп күтілуде. 

Билік жаңа су құбыры іске қосылғанда мәселе шешіледі деп үміттенеді, ал Қарасу резерв ретінде сақталады. Дегенмен жергілікті тұрғындар су қазір үзіліспен келетінін айтып, алаңдаушылық білдіруде.

Қазір Тайсойғаннан құбыр тартылып жатыр, ал жер асты Қарасуы күннен күнге тереңге кетіп барады. 2026 жылға дейін далада бір тамшы су қалады ма — әзірге белгісіз.

Ләззат ҚАРАЖАНОВА

Бүгін, 17:57