Атырау облысында ауыл тұрғындары күзгі терімге жұмылды

Атырау облысында ауыл тұрғындары көкөніс алқаптарына келіп, шаруаларға қолғабыс етіп жатыр, деп хабарлайды 24KZ. Биыл 9,6 мың гектардан 120 мың тоннадан астам өнім жиналуы тиіс. Оның 70 мың тоннасы картоп, пияз, сәбіз, қызылша секілді әлеуметтік маңызы бар дақылдар. Қалғаны маусымдық бау-бақша өнімдері. Ендігі міндет – осынау ел ризығын үсітпей дер кезінде жинап алу. Бүгінде Махамбет ауданында 120 адам егіс алқабында жүр.

Аумағы ат шаптырым алқап қайнаған еңбек қырманына айналған. Мұнда 40-қа тарта адам жаз бойғы төгілген тердің жемісін теріп жатыр. Сарытоғай ауылының тұрғындары жиын-терім науқанына төселіп алған. Бұған дейін олар 20 гектардан пияз жинапты. Енді бітік шыққан сәбізді суыққа ұрындырмай жинап алуға жұмыла кірісіп жатыр. Көмекке келгендерге кесімді жалақы белгіленген. Қосымша жинаған өнімінен алады.

Ләззат Тәжіғалиева, ауыл тұрғыны:

- Халыққа табыс болып жатыр. Жұмысы жоқтарға көмек. Жуа жинадық, қызылша жинадық. Әйтеуір не жинаса да, арасынан үлесімізді алып жатырмыз. Көлігімен әкеледі, аяғымыз жерге тимейді. Жұмысшылардың бар жағдайын жасап қойған.

Махамбет ауданының егіншілері үшін биыл күз берекелі болды. Олар қазірдің өзінде 5 мың гектар алқаптан 3 мың тонна картоп, 30 мың тоннадан астам көкөніс және 23 мың тоннаға жуық бау-бақша өнімдерін жинап үлгерді. Күзгі дала жұмыстарына жақын ауылдардан 100-ден аса тұрғын тартылған. Қазір негізгі жиын-терім науқаны аяқталуға таяу.

Олжас Мырзабаев, аудандық кәсіпкерлік және ауыл шаруашылығы бөлімінің басшысы:

- Қазір 3 шаруа қожалығы қалды, 40 гектардың үстінде. Ауыл халқы шаруа қожалықтарына көкөніс, картоп өнімдерін жинауға көмектесіп жатыр. Оларға көкөніспен қосымша қаражат беру қарастырылған. Жиын-терім науқанын 1 аптаның айналасына аяқтаймыз.

Биыл облыс бойынша 70 мың тоннаға жуық көкөніс түрлері жиналды. Сөйтіп, өңірде алғаш рет ішкі нарықты картоп, пияз сәбіз секілді өнімдермен қамту көрсеткіші 90%-тен асты. Өнім мол болса, табыс та еселене түсетіні белгілі. Сондықтан қожалықтар келер жылы егіс көлемін ұлғайтып, 13 мың гектарға жеткізуді межелеп отыр. Олардың тұқым, тыңайтқыш және жанар-жағармайға кеткен шығындарының бір бөлігін мемлекет өтейді.    

Азат Қапанов, облыстық Ауыл шаруашылығы және жер қатынастары басқармасының бөлім басшысы:

- Егін шаруашылығындағы 5 бюджеттік субсидиялау бағдарламасына жергілікті бюджет есебінен 465 млн теңге қаражат бөлінді Күні бүгінге 50 ден астам шаруа қожалығы субсидия алып, өз шаруашылықтарын реттеді. 

Мемлекеттің мұндай қолдауы ең алдымен тұтынушыға тиімді. Өйткені бүгінде қала базарлары мен жәрмеңкелерде жергілікті өнімдердің бағасы нарықтан 20-25% арзандады. Бұған дейін картопты Павлодардан, көкөніс пен бақша өнімдерін оңтүстіктен тасымалдап келген өңір үшін бұл үлкен жетістік.

Авторлары: Арыстанбек Кенже, Айбек Байзақов, Жандос Рахметуллин