Трамп Иранға қарсы бұрын соңды болмаған экономикалық операцияның басталғанын жариялады

АҚШ президенті Дональд Трамп TruthSocial желісіндегі парақшасында Иранға қарсы "ең жойқын экономикалық операцияның" басталғанын жариялады, деп хабарлайды Tengrinews.kz.

"Иранға мәміле жасасуға менен артық тиімді мүмкіндікті ешкім берген емес. Өкінішке қарай, олар бұл мүмкіндікті пайдаланбады. Сондықтан бүгін мен кез келген елге қарсы бұрын-соңды болмаған ең жойқын экономикалық операцияны жариялаймын. Бұл бұрын-соңды болмаған ауқымдағы экономикалық соғыс пен оқшаулау болады", - деп жазды Трамп.

Ақ үй басшысы бүгіннен бастап Иранға қандай да бір көмек көрсететін "кез келген ел" өзі де "орасан зор экономикалық зардаптарға тап болатынын" мәлімдеді.

"Бұл экономикалық "Д" күні болады және Иран қаупін оқшаулап, жеңу үшін барлық одақтастарымыз Америка Құрама Штаттарымен бір сапта тұруы қажет", - деп жазды АҚШ президенті.

"Мұнай контрабандасы, своп желілері, ақша аударымдары, айырбастау пункттері, кеме тізілімдері, жалған компаниялар - мұның бәріне дереу тоқтау салу керек... Бұлар тығырыққа тірелді және бұл тарихи шаралар олардың бүкіл әлемге террор тарату қабілетін тұншықтырады. Иранда ешқашан ядролық қару болмайды", - деп атап өтті Трамп.

Күні кеше CNN америкалық шенеунікке сілтеме жасай отырып, Трамп Иранға қатысты ұстанымын өзгерткенін, келіссөздерді жалғастырудан бас тартып, Тегеранға қысымды біртіндеп күшейтуге басымдық бергенін хабарлаған болатын.

18 тамызда Ақ үй басшысы TruthSocial желісінде Ормуз бұғазының картасын "АҚШ-тың жаңа аумағы" деген жазбамен жариялады. Бұған жауап ретінде Иран Сыртқы істер министрінің орынбасары Казем Гарибабади Трамптың Ормуз бұғазын АҚШ аумағы деп атап, қателесетінін және Иран жақын арада мұны түзететінін мәлімдеді.

Google News арқылы жаңалықтарымызды қадағалаңыз