Трамп Иранға қарсы әскери іс қимылдар аяқталғанын жариялады

АСТАНА, 2 мамыр – Sputnik. АҚШ президенті Дональд Трамп Конгреске Иранға қарсы әскери іс-қимылдар аяқталғанын хабарлаған хат жолдады, деп хабарлайды РИА Новости.

Президент Тегераннан келетін ықтимал қауіптердің алдын алу үшін америкалық күштер аймақта қалатынын нақтылады.

"2026 жылдың 7 сәуірінде мен екі апталық атысты тоқтату туралы бұйрық бердім. Содан бері атысты тоқтату мерзімі ұзартылды. 2026 жылдың 7 сәуірінен бастап Америка Құрама Штаттары мен Иранның қарулы күштері арасында атыс болған жоқ. 2026 жылдың 28 ақпанында басталған қақтығыс тоқтатылды", - деді Трамп хатта.

АҚШ президенті дегенмен министрлік ықтимал қауіптердің алдын алу үшін шаралар қолданатынын айтты.

"Тиісінше, қорғаныс министрлігі Иран мен онымен одақтас күштерден келетін қауіптерге қарсы тұру және АҚШ-ты, біздің одақтастарымыз бен серіктестерімізді қорғау үшін жекелеген елдердегі жауапкершілік аймағындағы күштердің орналасуын қажет және тиісті түрде түзетуді жалғастыруда", - деді Трамп.

Трамптың хатында сондай-ақ аймақтағы АҚШ әскерлерінің дайындығына енгізілген өзгерістер құжаттың құпия қосымшасында баяндалғаны көрсетілген.

1973 жылғы Әскери өкілеттіктер туралы заңға сәйкес, АҚШ президенті Конгресстің рұқсатынсыз шетелде қарулы күштерді 60 күнге дейін пайдалана алады. Осы ережеге сәйкес, Трамптың Иранға қарсы әскери өкілеттігі 1 мамырда аяқталады.

28 ақпанда АҚШ пен Израиль Ирандағы нысандарға шабуыл жасай бастады, салдарынан 3 мыңнан астам адам қаза тапты. Вашингтон мен Тегеран 8 сәуірде екі апталық атысты тоқтату туралы жариялады. Исламабадтағы кейінгі келіссөздер нәтижесіз аяқталды, дегенмен соғыс қимылдары қайта басталғаны туралы хабарланбады. Бірақ АҚШ Иран порттарын қоршауға алуды бастады. Делдалдар келіссөздердің жаңа кезеңін ұйымдастыруға тырысып бақты.