Трамп Иранмен соғыстың себептерін түсіндірді

Дональд Трамп АҚШ-тың Иранмен соғыста жеңіске жетіп жатқанын атап өтті. 

- Бүгін кешке АҚШ қарулы күштері Иранға қарсы «Эпикалық қаһар» операциясын бастағанына тура бір ай толады. Біздің қарулы күштеріміз шайқас алаңында жылдам, шешуші және талқандаушы жеңістерге жетті. Мұндай жеңістер бұрын-соңды болмаған, - деп мәлімдеді АҚШ президенті. 

Ақ үй басшысының атап өтуінше, енді Иранның флоты немесе әскери-әуе күштері жоқ. Иранның көптеген көшбасшылары көз жұмды. Ислам революциясы сақшылар корпусын басқару және бақылау әлсіреп келеді. Зымыран және ұшқышсыз басқарылатын аппараттар ұшыру мүмкіндіктері күрт төмендеді, ал қару-жарақ, зауыттар және зымыран ұшыру қондырғылары жойылып жатыр. 

- АҚШ Венесуэламен «мұнай мен газдың үлкен көлемін өндіру және сату» мәселелері бойынша ынтымақтастық орнатты «және енді АҚШ Таяу Шығыстан толығымен тәуелсіз. Біздің онда болуымыз міндетті емес. Бізге олардың мұнайы қажет емес», - деді ол. 

Трамп «Эпикалық қаһар» операциясы Америка мен еркін әлемнің қауіпсіздігін қамтамасыз ету үшін неліктен қажет екенін түсіндірді.

- 2015 жылы президенттік науқанымды жариялаған алғашқы күннен бастап мен Иранның ядролық қаруға ие болуына ешқашан жол бермеуге ант бердім. Ең маңыздысы, мен Барак Обаманың Иранмен апатқа айналған ядролық келісімін бұздым. Обама олардың құрметі мен адалдығын сатып алу үшін оларға 1,7 млрд доллар қолма-қол ақша берді. Бірақ бұл нәтиже бермеді. Олар біздің президентімізді мазақ етіп, ядролық бомба жасау миссиясын жалғастырды, - деп хабарлады ол.

Дональд Трамп Иранмен соғыстың себептерінің бірі ретінде кәдімгі баллистикалық зымыран қорын тез жиналуын атады. Оның айтуынша, соның арқасында Тегеран көп ұзамай АҚШ аумағына, Еуропаға және әлемнің кез келген жеріне жете алатын зымырандарға ие бола алатын еді.

- Мен «Эпикалық қаһар» операциясын жариялаған кезде айтқанымдай, біздің мақсаттарымыз өте қарапайым және түсінікті. Біз режимді Америкаға қауіп төндіру немесе өз ықпалын оның шекарасынан тыс жерлерге тарату мүмкіндігінен жүйелі түрде айырып отырмыз. Бұл Иранның қазірдің өзінде істен шығарылған әскери-теңіз күштерін жоюды, оның әскери-әуе күштері мен зымыран бағдарламасына бұрын-соңды болмаған зиян келтіруді және қорғаныс өнеркәсібі базасын жоюды білдіреді, - деп атап өтті Трамп соғыс мақсаттары туралы сөзінде. 

Ақ үй басшысы Таяу Шығыстағы одақтастары: Израиль, Сауд Арабиясы, Қатар, БАӘ, Кувейт және Бахрейнге алғыс айтты. Бұл ретте АҚШ президенті «Иран режимі қақтығысқа еш қатысы жоқ коммерциялық мұнай танкерлері мен көршілес елдерге ақылға сыймайтын террористік шабуылдар жасап жатқанын» атап өтті.

Америкалық көшбасшы атап өткендей, Құрама Штаттар Ормуз бұғазы арқылы мұнай импорттамайды және мұны болашақта да істемейді. 

- Ормуз бұғазы арқылы мұнай алатын елдер бұл бағытты қамқорлыққа алуы керек. Олар оны сақтауы керек. Оны бақылауға алып, қорғауы керек. Мұны істеу оңай. Біз көмектесетін боламыз, бірақ олар өздері қатты тәуелді мұнайды қорғауда көшбасшылықты қолға алуы керек, - деп мәлімдеді Дональд Трамп. 

Трамп бұл мәселені қалай шешуге болатыны туралы кеңес берді:

Біріншіден, мұнайды Құрама Штаттардан сатып алыңыз. Бізде ол мол. Бізде ол өте көп.

Екіншіден, батыл болыңыз — мұны бұрын біз сұрағандай бізбен бірге жасауыңыз керек еді.

Бұғазға барып, оны алыңыз, қорғаңыз, өзіңіз үшін пайдаланыңыз. Иран іс жүзінде жойылды. Ең қиыны артта қалды, сондықтан қалғаны оңай болады, - деп мәлімдеді ол.

АҚШ президенті келіссөз жүріп жатқанын, ал режимді ауыстыру олардың мақсаты болмағанын және ешқашан талқыланбағанын, алайда бұл алдыңғы көшбасшылардың өліміне байланысты болғанын атап өтті. Ол жаңа топтың өте радикалды емес және әлдеқайда сақ екенін қосты және егер жақын арада келісімге қол жеткізілмесе, Құрама Штаттар негізгі мақсаттарға назар аударатынын қосып өтті.

Еске сала кетсек, осыған дейін АҚШ президенті Дональд Трамп Иранға қарсы жүргізіліп жатқан әскери операцияның аяқталу кезеңіне өтіп жатқанын мәлімдеді. https://kaz.inform.kz/news/tramp-irandagi-operatsiyanin-ayaktalui-turali-aytti-e2ff35/

Сондай-ақ Иранның Сыртқы істер министрі АҚШ-пен келіссөзге қатысты пікір білдіргенін жаздық.