Трамптың Азияға сапары аяқталды

Президент Дональд Трамптың Азияға сапары аяқталды.

Алдымен Малайзия астанасы Куала-Лумпурға ат басын тіреген АҚШ басшысы Таиланд пен Камбоджа арасындағы қақтығысты реттеуге қатысты. Одан әрі Жапонияға аялдап, кейін Оңтүстік Кореядағы Азия-Тынық мұхиты экономикалық ынтымақтастығы саммитіне барды. Онда Ақ Үй басшысы Қытай төрағасымен кездесті. Сонымен Трамптың бір аптаға созылған сапарының қорытындысы қандай? 

Дональд Трамптың Азияға сапары жақсы көңіл-күймен басталды. Билеп, бойын сергіткен Ақ үй басшысы Малайзиядағы сапарында бірқатар құжаттарға қол қойды. Ең маңыздысы Таиланд пен Камбоджаның бейбіт келісімі. Құжат Куала-Лумпурда өткен Оңтүстік-Шығыс Азия мемлекеттері қауымдастығы саммиті аясында, Трамптың қатысуымен қабылданды. Ол "бұл келісім миллиондаған адамның өмірін сақтап қалуға мүмкіндік береді" деді. 

Жапония, Токио 

Дональд Трамптың Жапонияда да жүргізген келіссөздері жемісті болды. Күн шығыс елінің жаңа Премьер-министрі Санаэ Такаичимен жүздесіп, стратегиялық әріптестіктің «жаңа алтын ғасыры» жайлы келісімге қол қойды. Құжат экономикалық байланысты нығайтуға бағытталған. Келісім бойынша жапон тауарларына бірыңғай 15 пайыздық кедендік баж салығы енгізілді. Токио АҚШ экономикасына 550 миллиард доллар көлемінде инвестиция құяюға уәде берді. Бұдан бөлек тараптар стратегиялық инвестиция саласындағы өзара түсіністік туралы меморандумға қол қойды. Онда электр көліктерінің аккумуляторлары мен басқа да заманауи техника өндіруге қажет маңызды минералдарды жеткізудегі бірлескен жұмыс жоспары қарастырылған.   

Марко Рубио, АҚШ Мемлекеттік хатшысы:

- Бүгін біз Президент пен премьер-Министр келіскен бірқатар құжатқа қол қойдық. Бұл келіссөздердің барлығы  екі ел арасындағы ұзақ жылдар бойы қалыптасқан стратегиялық серіктестікке негізделген. Жапония талай уақыттан бері АҚШ экономикасындағы ең ірі инвесторлардың бірі. Бизнестің түрлі бағыттары бойынша бірлескен жобаларымыз да көп.

Оңтүстік Корея 

Жапониядан олжалы қайтқан Дональд Трамптың сапары Оңтүстік Кореяда жалғасты. Онда АҚШ басшысы Президент Ли Чжэ Мёнмен кездесіп, тараптар сауда келісімін жасасты. Нәтижесінде Оңтүстік Корея Америкаға 350 млрд доллар көлемінде инвестиция құятын болды. Оның 200 миллиарды қолма-қол берілсе, 150 млрд доллар кеме жасау саласындағы келісім аясында төленеді. Алайда бұл шешімге кей тұрғындар наразы.   

Ким Инаэ, тұрғын:

- 350 миллиард доллар Оңтүстік Корея мен халық үшін өте үлкен сома. Сонымен қатар бәрін бірден, тіпті қолма-қол ақшамен талап ету қанаумен тең ғой. Біз бұған үзілді-кесілді қарсымыз.  

Оңтүстік Корея 

Президент Дональд Трамптың Азияға сапары Қытай басшысы Си Цзиньпинмен кездесуімен аяқталды. Басқосуда сауда саясатында бақталасқа айналған екі елдің басшылары біржылдық келісім жасасты. Нәтижесінде АҚШ Қытай тауарларларына салынатын тарифтерді біршама төмендететін болып келісті. Тараптар жасанды интеллектіге арналған чиптер мен TikTok мәселесін де талқылады. Трамп келер жылы көктемде Қытайға баруға ниетті. 

Фариза Жанғанаева