Түбінде бәріміз өлеміз... : танымал журналист дау тудырған сұхбатынан кейін мәлімдеме жасады

Журналист Жанар Байсеміз қоғамда қызу талқыға түсіп, дау тудырған сұхбаты туралы пікір білдірді, – деп жазды Aikyn.kz.

Айтуынша, жайсыз түс көріп, сырқаттанып қалған.

"Үш күн жайсыз түс көрдім. Сұхбатқа келетін бір адаммен екі күн бойы түсімде ұрсысып шықтым. Дауысым шықпай, булығып қиналдым. Маған қатысты бір қитұрқы іс жасапты деймін. Соны жеткізе алмай қиналдым. 3-күні жұбайымның жоқ көңілдесі кіріпті. Жап-жас қыз екен деймін. Жанын шығардым байғұстың. 4-күні тамағымнан ұстап, қатты ауырып қалдым. 2 күндік бүкіл съемкамды кейінге қалдыруға мәжбүр болдым. Тамағым ауырмағалы көп жыл болған. Таңертең мамамның әдісімен тұзбен бастым. Жөтел қысып жатыр. Жайсыз түстерімнің мәнісін бүгін ұқтым. Ол жайында айтамын ба, айтпаған дұрыс па көремін. Не болса да қайыры бар шығар. Сұмдық резонанс тудырған сұхбатыма қатысты. Рухым сездірген екен», - деді ол.

Журналист ешкіммен дауласып, ақталғысы келмейтінін атап өтті.

«Мені сырттай күстәналап, айыптап, жамандап жатқан, істің байыбына бармай байбалам салып жатқан адамдардың жүрегі тыныштық тапсын. Жандары махаббатқа бөленсін. Құдай түбін берсін. Түбінде бәріміз өлеміз. Аз ғана өмірде бір-бірімізге жамандық тілемей, тату-тәтті өмір сүрейік. Бұл тредс те, тик ток та, инста да, фейсбук те бәрі қалады… Ешкіммен жауласқым келмейді, дауласқым да келмейді, дәлелдегім де, түсіндіргім де, ақталғым да келмейді. Бәрі өткінші.  Дәл қазір мен ауырып жатырмын. Бұл да уақытша. Дәл қазір мен жеңілдім. Бұл да уақытша. Дәл қазір сенің дәуренің жүріп тұр. Ол да уақытша. Дәл қазір сенің сөзің өтіп тұр. Ол да уақытша. Дәл қазір сенің дәулетің тасып тұр. Ол да уақытша. Дәл қазір сенің билігің жүріп тұр. Ол да уақытша. Мен де уақытша. Сен де уақытша», - деп жазды Жанар Байсеміз. 

Еске сала кетейік, Жанар Байсеміз жақында өзін имам деп таныстырған Ахмед Құрбанәлиден сұхбат алған болатын. Сұхбатта кейіпкер екінші әйелін шәкіртіне күйеуге бергенін ашық айтты. Осыдан кейін оған айыппұл салынды. 

Сараптама, зерттеу мақала, күнделікті өзекті ақпаратты «Айқынның»  TELEGRAM   арнасынан табасыз.