Туризмге серпін береді

Сурет; abai.kz

Бүгінде Қытайдың Қорғас пен Достық шекара өткелдерінен шығатын жүктердің Ақтау мен Құрық теңіз порттарына дейін жетуі үшін тұтас құрлық дәлізін қалыптастыру маңызды. Ең бас­тысы, жаңа автожол пай­да­лануға берілгеннен кейін бұрын­ғы айналма бағыт шамамен мың ша­қырымға қысқа­рып, жүк жет­кізу уақыты 4,5–5 тәуліктен 3 тәу­лік­ке дейін азаяды. Яғни тасы­мал­­­даушылардың шығынын азай­­­тып, еліміз арқы­лы өтетін халық­­аралық тран­зиттің құнын төмен­детеді. Соның нәти­жесінде еліміз арқылы өте­тін жүк тасы­малы­ның көлемі артып, тран­зиттік дә­ліздің тартымдылығы еселенбек.

Бейнеу ауданы үшін бұл жобаның маңызы ерекше. Өйт­кені ауданымыз ежелден тоғыз жолдың торабы саналады. Алдағы уақытта автомобиль, теміржол, теңіз логистикасы тоғысатын ірі көлік торабы ретінде дами түседі. Осылайша, инфрақұрылымның бір жерде шоғырлануы ірі мультимодальды көлік-логистикалық хаб қалып­тастыруға мұрындық болмақ.

Жаңа автожолдың тағы бір маңыз­ды тұсы – өңірдің турис­тік әле­уетін арттыруға ықпал етуі. Маңғыстау – еліміз­дің теңіз жағалауына ие жалғыз өңірі. Кейінгі жылдары облыс­тың табиғи көрікті жерлері мен тари­хи-мәдени нысандары ха­лықаралық деңгейде кеңі­нен насихатталып келеді. Жол қатына­сы­ның жақсаруы өңірге келе­тін туристердің санын көбей­тіп, ішкі туризмнің дамуына жол ашады.

Жоба өңіраралық экономи­калық байланысты нығайтуға да үлкен үлес қосады. Мәселен, оңтүстік өңірлерден Маңғыстауға көкөніс пен жеміс-жидек секілді ауыл шаруашылығы өнімдерін жеткізу жеңілдейді. Ал Бейнеу ауданында өндірілетін ұлутас және басқа да құрылыс мате-­риалдарын еліміздің өзге өңірлеріне тасы­малдау әлдеқайда тиімді бола­ды. Бұл кәсіпкерлер үшін жаңа нарықтарға жол ашып, өңір­аралық сауда айналымын ұлғайт­пақ. Сонымен қатар Ақтау және Құрық теңіз порттары ар­қы­лы Ираннан және басқа мем­лекет­­терден келетін жүктерді елі­міз­­дің оңтүстік пен орталық өңір­леріне жеткізу мүмкіндігі де кеңейеді.

Бейнеу тұрғындары бұл бас­таманы жай ғана жол құрылысы емес, өңірдің болашағына салын­ған инвестиция деп қабылдайды.

Ардақ БОРАШ,

Бейнеу аудандық мәслихатының төрағасы

Маңғыстау облысы