Түркістан облысында көктемгі егіс науқаны басталды

Өңірде биыл ауыл шаруашылығы дақылдарының егіс алқабы 8 мың гектарға ұлғайып, жалпы көлемі 919 мың гектарға жетті.
Қазірдің өзінде жоспарланған 18,2 мың гектардың 7 мың гектарына ерте пісетін көкөністер мен картоп егілді.

Жалпы егіс құрылымында 536 мың гектар жаздық дақылдарға, 208 мың гектар күздік егіске, ал 175 мың гектар көпжылдық шөптерге тиесілі. Облыстық ауыл шаруашылығы басқармасының басшысы Файзулла Байдуллаевтің айтуынша, биыл егіс құрылымын әртараптандыру және су ресурстарын тиімді пайдалану шаралары күшейтілді.

Соның нәтижесінде мақта алқабы 17 мың гектарға ұлғайып, 162 мың гектарға жетті. Жүгері 55,2 мың гектарды, ал мақсары 85,4 мың гектарды құрады. Ал суды үнемдеу мақсатында күріш алқабы 7 мың гектарға, бидай егістігі 25 мың гектарға қысқартылды.

Қазір жер жырту жұмыстарының 82 пайызы, топырақ шаю жұмыстарының 52 пайызы орындалды. Биыл 203,5 мың тонна минералдық тыңайтқыш енгізу жоспарланып отыр. Облыстық бюджеттен 134 мың тонна тыңайтқышты субсидиялауға 9,5 млрд теңге бөлінген.

Көктемгі дала жұмыстарын қаржыландыру Аграрлық несие корпорациясы арқылы жүргізілуде. Қазірдің өзінде 8,4 млрд теңгеге өтінімдер мақұлданып, 7,2 млрд теңге көлемінде 321 жоба қаржыландырылды, тағы 15 млрд теңгеге өтінімдер қаралуда.

Науқанға 37,4 мың ауыл шаруашылығы техникасы жұмылдырылады. Мемлекеттік қолдау нәтижесінде өткен жылы 1 872 техника сатып алынып, техникалық парктің жаңару деңгейі 9,2 пайызға жетті. Биыл тағы 2 029 техника сатып алу жоспарланған.