Түркістанда қыз алып қашпақ болған екі жігітті полиция тоқтатты

Түркістан облысында екі жігіттің қызды алып қашу әрекетінің жолы кесілді, – деп хабарлайды Aikyn.kz сайты.

Полиция қызметкерлері жол бойында келе жатқан Kia автокөлігінің ішіндегі бойжеткеннің қолын бұлғап, көмек сұрағанын байқап қалған. Күдік тудырған көлік тоқтатылған кезде қыз сыртқа жүгіріп шығып, тәртіп сақшыларынан көмек сұраған.

Оқиғаға байланысты мәжбүрлеп некеге тұрғызу әрекеті фактісі бойынша қылмыстық іс қозғалды.

Алайда кейінірек бойжеткен аталған жігітпен бұрын кездесіп жүргенін, кейін екеуінің арасында жанжал туындағанын мәлімдеді. Сондай-ақ ол жігітке қатысты арыз жазудан бас тартқан.

Қазіргі уақытта оқиғаның барлық мән-жайын анықтау үшін жан-жақты тексеру жүргізіліп жатыр.