Уайымдаудың қажеті жоқ, мұны бұрын да бастан өткергенбіз : Қаржы министрлігінде тексерулерге қатысты сұрақтарға жауап берді

Қанша қазақстандық табыс көзін растай алмады және қазір салық органдарында кімдерге қатысты сауалдар туындап отыр? Үкіметте өткен брифингте қаржы вице-министрі Әсет Тұрысовқа осындай сұрақ қойылды, деп хабарлайды Tengrinews.kz тілшісі.

Тұрысов салық органдарының жұмысы үздіксіз жүргізілетінін және ол есептілік тапсыру мен салық төлеу мерзімдеріне байланысты екенін атап өтті.

"Мысалы, жақында жылжымайтын мүлік бойынша хабарламалар жіберілді. Қазір жылжымайтын мүлік салығын, кейін автокөлік салығын төлеу кезеңі жүріп жатыр. Заңды тұлғалар есептілік тапсырғаннан кейін де тиісті жұмыстар жүргізіледі", - деді вице-министр.

Шенеунік сауал туындаған азаматтардың нақты санын айта алмады, өйткені бұл көрсеткіш үнемі өзгеріп отыратынын алға тартты. Сондай-ақ, оның айтуынша, Мемлекеттік кірістер комитетінің қызметкерлері бір-бір жарым жылға жуық уақыт бойы өз жұмысында Smart Data Finance платформасын және басқа да цифрлық жүйелерді қолданып келеді.

"Сондықтан, алаңдаудың қажеті жоқ деп ойлаймын: біз бұл кезеңдердің әрқайсысынан өткенбіз. Келесі жылы заңды тұлғалар есептілік тапсырған соң, әріптестеріміз тағы да тиісті жұмыстарды атқарады", - деп толықтырды ол.

Бұған дейін Әсет Тұрысов Қазақстанда әрбір салық төлеушіге - жеке және заңды тұлғаға - цифрлық құжаттама жасалғанын айтқан болатын. Оған жылжымайтын мүлік, көлік және басқа да деректер түседі. Бұрын жарияланған ақпаратқа сәйкес, Smart Data Finance аналитикалық жүйесі 74 дереккөзден мәлімет жинаған.

Тағы оқыңыз: Жалақысы 300 мың теңге, пәтері 100 миллион теңге: салық органдары нені сұрайды?

Бізді Google-дың негізгі дереккөздер тізіміне қосыңыз