Үкімет Ясауи мұрасын ілгерілету жөніндегі жоспарды бекітті

Құжатта ұлы ойшылдың мұрасын зерделеу, сақтау және насихаттау, сондай-ақ Түркістан қаласын рухани туризмнің негізгі орталықтарының бірі ретінде дамытуға бағытталған 37 іс-шара қарастырылған.

Жоспар бес негізгі бағытты қамтиды. Атап айтқанда, институционалдық және құқықтық базаны жетілдіру, ғылыми-зерттеу және білім беру ісін дамыту, мәдени-ағартушылық және шығармашылық жобаларды жүзеге асыру, ақпараттық-имидждік және халықаралық іс-шараларды өткізу, сондай-ақ қалпына келтіру жұмыстары көзделген.

Жастармен және мектеп оқушыларымен жұмыс істеуге ерекше көңіл бөлінген. Іс-шаралардың басым бөлігі Түркістан қаласында өтеді. Атап айтқанда, оқушылар арасында дәстүрлі «Ясауитану» байқауының республикалық кезеңін өткізу және музей жанынан «Ясауитану» клубын ашу жоспарланып отыр.

Сонымен қатар жоспар аясында Қожа Ахмет Ясауи шығармалары мен ғылыми еңбектерін басып шығару, ойшыл мұрасын отандық және шетелдік ғылыми орталықтар мен мұрағаттардан анықтау, мұрағат материалдары мен құжаттарының каталогін әзірлеу көзделген.

Ясауи мұрасын кеңінен насихаттау мақсатында туристерге арналған ақпараттық өнімдер жаңартылмақ. Оның ішінде гайдбуктар, бейнероликтер мен аудиогидтер әзірлеу, шетелдік туристерге бейімделген жаңа туристік маршруттар қалыптастыру, сондай-ақ кесенеде ғылыми-реставрациялық жұмыстар жүргізу жоспарланған.

Құжатта ЮНЕСКО-ның «Әлем жады» бағдарламасы аясында Ясауидің табылған және зерттелген жазба мұрасын ілгерілету, сондай-ақ ЮНЕСКО мен ИСЕСКО шеңберінде Ясауи жылын немесе арнайы мәдени күндерді жариялау мәселесін пысықтау қарастырылған.

Жоспарды іске асыру Қожа Ахмет Ясауи мұрасын сақтау және зерделеу жұмыстарын кеңейтуге, оның ел ішінде және халықаралық деңгейде насихатталуын күшейтуге, сондай-ақ Түркістанның маңызды рухани, мәдени және туристік орталық ретіндегі әлеуетін арттыруға мүмкіндік береді.

Айта кетейік, мемлекеттік наградалар қатарына Қожа Ахмет Ясауи ордені енгізіледі.