Ұлттық банк халыққа берілетін несие өсімін бәсеңдетуді жоспарлап отыр

"Негізгі сегмент – кепілсіз тұтынушылық несиелер – қарқыны одан әрі төмендеді. Жалпы портфельдің өсімі 2025 жылы 14,6% құрады, ал 2024 жылы бұл көрсеткіш 29,2% болған. Несиелерді беру қарқыны да едәуір баяулады – 2025 жылы 6,3%, 2024 жылы 22,7% болған", – деді Ұлттық банк басшысы.

Сонымен қатар, ол кепілді тұтынушылық несиелер (29%) және автонесиелердің (30%) өсу қарқыны әлі де жоғары екенін атап, осы несиелердің сапасын Агенттікпен бірлесіп бақылау жалғасатынын айтты.

"2026 жылы халыққа берілетін несие өсімін теңгерімсіздікке әкелмеу үшін қосымша шаралар қабылданады. Біз макро- және микроқаржылық құралдарды қолданамыз. Биыл барлық банктерді біріккен QR-төлем жүйесіне қосып, цифрлық келісім сервисін енгізіп, ірі төлемдер мен несиелерді рәсімдеу кезінде биометрияны кеңінен қолдануды жоспарлап отырмыз. Бұл – алаяқтықтың алдын алу үшін қажет", – деп түйіндеді Тимур Сүлейменов.

Еске салсақ, 2026 жылғы 5 ақпанда Ұлттық банк пен Қаржы нарығын реттеу және дамыту агенттігінің шаралары халыққа берілетін несиелердің өсу қарқынын бәсеңдеткені хабарланған еді.