Ұлттық банк цифрлық теңге айналымын 1 трлн теңгеге жеткізуді жоспарлап отыр

Қазақстан Ұлттық банкі цифрлық теңгені кеңінен енгізу жұмыстарын жалғастырып, оның айналым көлемін 1 триллион теңгеге дейін ұлғайтуды көздеп отыр.
Бұл туралы Сенаттың жалпы отырысында Ұлттық банк төрағасы Тимур Сүлейменов мәлімдеді.

Оның айтуынша, Мемлекет басшысының тапсырмасына сәйкес елімізде Ұлттық цифрлық қаржы инфрақұрылымы толыққанды іске қосылған. Аталған жүйе қауіпсіз биометриялық сәйкестендіруді, банкаралық төлемдер мен аударымдарды, цифрлық теңгені, алаяқтықтан қорғау тетіктерін және заманауи цифрлық сервистерді біріктіреді.

«Өткен жылы шамамен 340 миллиард теңге көлемінде цифрлық теңге шығарылды. Биыл Үкіметпен бірлесіп бекітілген Жол картасы аясында цифрлық теңгені мемлекеттік қаржы саласында пайдалану аясы кеңейтіледі. Соның нәтижесінде оның айналымын 1 триллион теңгеге дейін жеткізуді жоспарлап отырмыз», – деді Тимур Сүлейменов.

Ұлттық банк басшысы қаржылық алаяқтықпен күрес мәселесіне де тоқталды. Оның айтуынша, Ұлттық антифрод-орталықтың жұмысы нәтижесінде 68 миллиард теңгеден астам сомаға күмәнді және алаяқтық операциялардың жолы кесілген.

Сонымен қатар орталықтың қызметі арқасында 95 мыңнан астам азаматтың қаржылық мүддесі қорғалып, заңсыз қаржы операцияларынан келуі мүмкін шығындардың алдын алу мүмкін болған.

Сарапшылардың пікірінше, цифрлық теңгені кеңінен енгізу мемлекеттік қаражаттың ашықтығын арттырып, бюджет қаражатының мақсатты жұмсалуын бақылауға мүмкіндік береді. Сондай-ақ бұл қаржы жүйесінің қауіпсіздігін күшейтіп, төлем инфрақұрылымын одан әрі цифрландыруға жол ашады.