Ұлыбританияда алғаш рет әйел Кентербери архиепископы атанды

Инаугурация рәсімі Кентербери соборында өтіп, оған шамамен 2000 адам қатысты. Қонақтардың қатарында Ұлыбритания тағының мұрагері ханзада Уильям жұбайы Кэтринмен бірге, Уэльс ханшайымы, сондай-ақ премьер-министр Кир Стармер және дін қызметкерлері болды.

Малалли XIII ғасырдан бері келе жатқан Әулие Августин кафедрасына отырды. Ол бұл қызметке ресми түрде қаңтар айында кіріскенімен, дәл осы Кентерберидегі рәсім оның қызметінің жария басталуы саналады.

Алғашқы уағызында архиепископ өз қызметіне дайын екенін айтып, Таяу Шығыс, Украина, Судан және Мьянма секілді қақтығыс аймақтарында бейбітшілік орнатуға шақырды.

Сондай-ақ ол шіркеудің өткендегі қауіпсіздікке қатысты қателіктерін атап өтіп, шындық, жанашырлық, әділдік және жауапкершілік қағидаларын ұстану қажеттігін айтты. Оның алдында қызмет атқарған Джастин Уэлби 2024 жылы балаларға қатысты зорлық-зомбылықты жасыруға байланысты жанжалдан кейін отставкаға кеткен еді.

Рәсім барысында бірнеше тілде дұғалар оқылды. Малалли 1966 жылы Рим папасы Павел VI архиепископ Майкл Рэмсиге сыйлаған сақинаны қабылдады. Бұл сақина Генрих VIII дәуіріндегі бөлінуден кейін англикан және католик шіркеулерінің жақындасуының символы саналады.

Малаллидің тағайындалуы англикан қауымының консервативті бөлігінің сынына ұшырады. Дегенмен балама басқару орталығын құру жоспарлары кейін қайта қаралды. Шіркеу ішіндегі әйелдердің рөлі мен ЛГБТ мәселесіне қатысты көзқарас айырмашылықтары әлі де сақталып отыр.

Айта кетейік, былтыр қазан айында 63 жастағы Сара Маллалли Кентерберийдің жаңа архиепископы болып тағайындалғанын жазғанбыз. Ал ұлықтау рәсімі биылғы наурыз айына жоспарланған еді.