Ұлыбританияда соңғы екі ғасырдағы ең ауқымды полиция реформасы таныстырылды

«Жергіліктіден ұлттық деңгейге: полиция қызметінің жаңа моделі» деп аталған құжат Англия мен Уэльстегі құқық қорғау жүйесін түбегейлі жаңғыртуды көздейді.

Реформаның негізгі бағыттарының бірі – технологиялық жаңарту. Үкімет 140 млн фунттан астам қаржыны бет-әлпетті тану жүйелері мен бейнематериалдарды талдауға арналған жасанды интеллектіні енгізуге бағыттайды. Осы жұмыстарды үйлестіру үшін Police.AI ұлттық орталығы құрылады. Автоматтандыру жыл сайын 6 млн жұмыс сағатын үнемдеп, шамамен 3 мың полицейдің қағазбастылықтан босап, патрульдеу мен азаматтармен жұмысқа көбірек көңіл бөлуіне мүмкіндік береді.

Нақты уақыт режимінде бет-әлпетті танитын мобильді кешендер саны бес есе артады. Англия мен Уэльстегі барлық полиция бөлімшелері зорлық-зомбылық және жыныстық қылмыстарға күдіктілерді іздеуге арналған 50 қондырғыға қол жеткізеді.

Сонымен қатар бейнебақылау камералары, «ақылды» қоңыраулар мен азаматтар ұсынған мобильді құрылғылардағы жазбалар арқылы күдіктілерді анықтайтын ІІ құралдары енгізіледі. Бұл, әсіресе, алаяқтық пен ұйымдасқан қылмысқа қарсы күресті күшейтпек.

Билік өкілдерінің айтуынша, жаңа технологиялар телефондар мен ноутбуктердегі жасырын деректерді алуды жеңілдетіп, ауыр қылмыстар, соның ішінде балаларға қатысты жыныстық зорлық-зомбылық істерінің ашылу көрсеткішін арттырады.

Реформа аясында Ұлттық полиция қызметі құрылады. Ол ең ауыр қылмыстармен күреске бағытталып, құрамына Ұлттық қылмысқа қарсы агенттік, терроризмге қарсы полиция және басқа да арнайы бөлімшелер енеді. Қызметті ұлттық полиция комиссары басқарады. Орталықтандыру жергілікті бөлімшелердің жүктемесін азайтады. Ал бірлескен сатып алулар жылына 350 млн фунтқа дейін үнемдеуге мүмкіндік береді.

Сондай-ақ полиция қызметкерлеріне қойылатын талаптар күшейтіледі: бүкіл мансап бойына міндетті лицензиялау енгізіліп, зорлық-зомбылық үшін сотталған тұлғаларға қызмет етуге тыйым салынады. Министрлер тиімсіз жұмыс істеген басшыларды қызметтен босата алады. Барлық полиция күштері үшін бірыңғай тиімділік көрсеткіштері белгіленеді. Қалаларда полиция ауыр оқиғаларға 15 минутта, ауылдық жерлерде 20 минутта жетуі тиіс, ал 999 нөміріне түскен қоңыраулар 10 секундтан аспайтын уақытта қабылдануы қажет.

Айта кетейік, былтыр Швециядағы әлеуметтік реформа Данияның қателігін қайталауы мүмкін екенін жаздық. 

Ал жуырда Пезешкиан Иранда реформа жүргізуге дайын екенін мәлімдеді.