Ұлыстың ұлы күні тазалық философиясын кеңінен дәріптеу маңызды Президент

— Ең алдымен, баршаңызды Ұлыстың ұлы күні — әз-Наурыз мейрамымен шын жүректен құттықтаймын!

Әз-Наурыз — тазару, жаңару уақыты. Тазалық — мән-мағынасы кең ұғым. Бұл — ең алдымен, ой тазалығы, сана мен ниет тазалығы деген сөз.

Осыдан екі жыл бұрын елімізде «Таза Қазақстан» жалпыұлттық акциясы бастау алды. Ауқымды жоба халықтың, әсіресе, жастардың жаппай қолдауына ие болды. Азаматтарымыз тазалықты құр сөзбен емес, нақты ісімен көрсетуде. Ұқыптылық, жинақылық, тиянақтылық қасиеттері ұлтымыздың жаңа сапасына айнала бастады, — деді Мемлекет басшысы.

Президент «Таза Қазақстан» бастамасы — жай ғана кезекті саяси науқан немесе үгіт-насихат емес екенін айтты. 

— Жалпы, «Таза Қазақстан» бастамасы — жай ғана кезекті саяси науқан немесе үгіт-насихат емес, бұл — мемлекетіміздің мызғымас идеологиясы. Сондықтан осы игі іспен біз жыл бойы айналысуымыз керек, бұл ұлт болмысының ажырамас бөлігі болуға тиіс. Әсіресе, Ұлыстың ұлы күні тазалық философиясын кеңінен дәріптеу маңызды.

Ұлыстың ұлы күні Жер Ана да, еліміз де жаңарып жатқан осы тарихи сәтте айтылған тілектің мән-мағынасы айрықша деп ойлаймын.

Сондықтан ең бастысы елімізге амандық, жерімізге тыныштық тілеймін. Қасиетті Отанымыз — Қазақстан Республикасы мәңгі жасасын! Ата заңымыз өз тұғырынан түспесін! Туымыз биікте желбіресін! Ұлыс оң болсын, ақ мол болсын! Еліміздің төрт құбыласы түгел болсын, — деді Қасым-Жомарт Тоқаев.

Айта кетелік Президент Қасым-Жомарт Тоқаев Қожа Ахмет Ясауи кесенесіне зиярат еткен еді.