Ұлытау облысында ескек есу мектебі ашылды

Заманауи талаптарға сай салынған қос қабатты ғимаратта спортшылардың жан-жақты дайындалуына барлық жағдай қарастырылған. Мұнда теориялық сабақтарға арналған оқу сыныптары, жаттығу залдары, жуыну және киім ауыстыру бөлмелері жабдықталған.

Осы уақытқа дейін өңір спортшылары аталған спорт түрімен тек жаз мезгілінде ғана шұғылданса, енді жаңа нысанның ашылуымен жыл бойы жаттығу жасауға мүмкіндік туды. Сонымен қатар қыс мезгілінде ескек есушілердің шаңғы спорты арқылы жалпы дене дайындығын жетілдіруіне де қолайлы жағдай жасалып отыр. Бұл – спортшылардың кәсіби шеберлігін арттырып, республикалық және халықаралық жарыстарда жоғары нәтижеге қол жеткізуіне негіз болмақ.

Ашылу салтанатында Ұлытау облысының әкімі Дастан Рыспеков ескек есу спортының өңір үшін тарихи маңызы зор екенін атап өтті.

– Ескек есу спорты да аймағымызда өзіндік орны бар, талай дарынды спортшыларды түлеткен сала. Бүгінгі жаңа мектеп – сол игі дәстүрдің жалғасы. Біз жас спортшылардың кәсіби тұрғыда өсуіне, халықаралық ареналарда ел намысын қорғауына барлық қажетті жағдайды жасай береміз, - деді өңір басшысы.

Бүгінде Ұлытау облысында бүгінгі таңда 9 жаңа спорт кешені пайдалануға беріліп, спорттық инфрақұрылым 25 пайызға жаңартылды. Бұл – бұқаралық спортты дамытуға және салауатты өмір салтын қалыптастыруға бағытталған жүйелі жұмыстың нәтижесі.

Айта кетейік, жаңа нысан бой көтерген Жезқазған қаласының Батыс ауданында сол күні Қазақстан Республикасының Ұлттық Банкі ғимараты да ашылды. Бұл – облыс орталығындағы жаңа ауданның жүйелі әрі қарқынды дамып келе жатқанын айқын көрсетеді.

Жалпы, қаланың жаңа бөлігі алдағы уақытта өңір дамуының заманауи келбетін айқындайтын маңызды орталыққа айналмақ. Биыл маусым айында мұнда оқушылар сарайын ашу жоспарланды. Сондай-ақ жаңа емхананың құрылысы басталады деп күтіліп отыр. Бұл бастамалар тұрғындардың өмір сапасын арттырып, әлеуметтік инфрақұрылымды жаңа деңгейге көтеруге бағытталған.