Ұлытау облысында жедел басқару орталығы ашылды

Әмбебап кешен  өңірдегі 4 мыңға жуық бейнебақылау камерасын тәулік бойы қадағалайды.

 Бақылау құралдары көшелер, әлеуметтік нысандар мен тұрғын үйлердің ауласына орнатылған. Мамандар жасанды интеллектіге негізделген мұндай камералар тұрғындардың қауіпсіздігін қамтамасыз етеді дейді.

Жедел басқару орталығына қала мен аудандардағы 3645 бейнебақылау камерасы қосылған. Оның 34-і көлік жылдамдығын бақылайды. Адамның бет-жүзі арқылы жеке басы мен көліктің мемлекеттік номерін анықтайтын 100-ден астам камера бар. Жедел басқару орталығы бұған дейін сынақ режимінде жұмыс істеді. Тәртіп сақшыларының айтуынша осы аралықта тіркелген қылмыс мен заң бұзушылықтың 90 пайызы бақылау камерасының   көмегімен ашылған.

Зәкір Бидайбай, облыстық ПД Ақпараттандыру және байланыс басқармасының бастығы:

- Жедел басқару орталығына қосылған бейнекамералары жасанды интеллект бағдарламасымен жұмыс істейді. Кез келген заң бұзушылық автоматты түрде анықталады. Тіпті қоқыс алаңдарының тазалығын да осы құрылғылар қадағалайды. Жол ережесін бақылайтын дрондарға түсірілген бейнежазбалар да осы орталыққа түсіп отырады. 

Облыс бойынша 20-дан астам дабыл батырмасы орнатылды. Одан шыққан сигнал да тікелей осы орталыққа түсіп, полицейлер жедел әрекет етеді. Сондықтан өңірдегі басқа да қала-аудандарда шағын басқару орталығы құрылуда.  Оларға қажетті бейнекамераларды жергілікті әкімдік орнатып береді.

Бақдәулет Ғани, облыстық цифрлық технологиялар басқармасының маманы:

- 2026 жылға облысымызда 830 қосымша бейнебақылау камерасын орнату жоспарланды. Оның ішінде 30-ы аппараттық бағдарламалық кешен. Аталған шаралар облысымызда қауіпсіздіктің негізін арттыру және тұрғындарға қолайлы өмір сыйлауға бағытталған. 

Өңірде қоғамдық қауіпсіздік саласын цифрландыру мақсатында арнайы бағдарлама жасалды. Ол құжат бойынша 2029 жылға дейін облыстағы бейне бақылау құрылғыларының санын 7 мыңға дейін жеткізу жоспарланып отыр.

Елдос Кәкенов, Нұрбол Үздікбаев