Үндістан мұғалімдері Қазақстанның инклюзивті білім беру жүйесін зерттеп жүр

Үндістандық ұстаздар Қазақстанның инклюзивті білім беру жүйесін зерттеуде.

Олар Алматыдағы мектеп-гимназияның бірінде оқу үдерісімен танысты. Бұл сапар Бүкіләлемдік Инклюзия Білім Конгресі – Уолд Инклюжн Конгрес (World Inclusion Congress) аясында өтті. Ауқымды шара алғаш рет ұйымдастырылып отыр. Оған әлемнің 40 елінен 1200-ден аса маман жиналды. Шара аясында шетелдік сарапшылар баяндама жасап, мұғалімдер өзара тәжірибе алмасты.

WorldInclusionCongress білім беру жүйесіне технологиялық шешімдерді енгізуге бағытталған. Оның мақсаты оқыту сапасын арттырып, тәжірибе алмасу және барлық балалар үшін қолайлы орта құру. Конгреске келген үндістандық делегаттар Алматыдағы № 200 мектеп-гимназияның жұмысымен танысты. Мұнда 3 мыңнан аса оқушы білім алады. Оның 25-і – ерекше білім беру қажеттіліктері бар балалар. Олар үшін арнайы кабинет жұмыс істейді. Сабақтан тыс уақытта оқушыларға психологиялық-педагогикалық қолдау көрсетіледі. Балалармен тьюторлар, психологтар, дефектологтар мен логопедтер жұмыс істейді. Делегацияға топтық және жеке сабақтар көрсетілді.

Снехаль Пинто, білім беру ұйымдары желісінің директоры /Үндістан/:

- Басты тұжырымдардың бірі мынадай: баланың ерекшелігі – бұл шешуді қажет ететін мәселе емес, ол түсінуді қажет ететін нақты жағдай. Мұнда бала өзін сенімді сезінетіндей жағдай жасалған. Мектепте инклюзивті тәсіл тиімді жүзеге асырылып жатыр. Мұндай ортада болу бала үшін үлкен қуаныш. 

Делегацияның бұл мектепті таңдауы бекер емес. Халықаралық Global Teacher Prize байқауының жеңімпазы Айгүл Ишанғалиева осы мекктепте ұстаздық етеді. Ағылшын тілінің маманы 2023 жылы әлемнің ең үздік 50 мұғалімінің қатарына енген болатын. Ал соңғы төрт жылда ол волонтер ретінде ерекше қажеттіліктері бар оқушыларды ҰБТ-ға дайындаумен айналысты. Айгүл әр оқушыға жеке тәсіл табуға тырысады. Оның кеңінен қолданатын әдістерінің бірі жобалық жұмыстар. 

Айгүл Ишанғалиева, ағылшын тілі пәнінің мұғалімі:

- Оқымайтын бала да болмайды, нашар оқушы да болмайды. Оның барлығы мұғалімге байланысты. Өзімнің методикамда көбінесе жоба әдісін қолданамын. Себебі ол әдіс баланың өзінің алдындағы кедергіні жеңуіне көмектеседі. Сондай жоба әдісі ретінде балалар деген жетістікке жетуге болады. Сол жоба әдісі арқылы менде ағылшынды білмейтін оқушым өзі дайындап, өзі үйреніп, ең соңында маған кубок алып келді. 

Қазақстанда инклюзивті білім беру Мемлекеттік әлеуметтік саясаттың маңызды бөлігіне айналды. Бұл бағытты жүзеге асыру үшін еліміздің мектептерінде 10 мыңнан аса арнайы педагог жұмыс істейді. 

Гүлжан Көленқызы, Айдос Калиев, Радик Джакупов