Ұшақтағы кездейсоқ кездесу шетелдікті үш айдан кейін Алматыға алып келді

Нидерландық Накиб Қазақстан туралы кездейсоқ ұшақта танысқан екі алматылықтан естіген. Олардың ел туралы әңгімелеріне қызыққаны соншалық, бірнеше айдан кейін Алматыға өзі арнайы келді, деп хабарлайды Tengri Travel.

Сапарға қалай бел буған?

Осыдан бірнеше ай бұрын нидерландық Накиб Қазақстан туралы мүлдем ештеңе білмеген. Елге деген қызығушылығы Малайзиядан Балиге ұшып бара жатқан ұшақта екі қазақстандықпен кездейсоқ танысқаннан кейін пайда болды.

Накибтің айтуынша, ұзақ ұшу кезінде жаңа таныстары оған Қазақстан, оның табиғаты мен адамдары туралы айтып берген.

"Осыдан үш ай бұрын мен Қазақстан туралы ештеңе білмейтінмін, тіпті мұнда келу туралы ойламаппын да. Малайзиядан Балиге баратын ұшақта алматылық екі жігітпен танысқан соң бәрі өзгерді. Ұзақ ұшқандықтан, олар маған Қазақстан, оның табиғаты мен адамдары туралы көп нәрсе айтты", - деп бөлісті Накиб.

Бұл кездесуден кейін елге деген қызығушылығын әлеуметтік желілер де арттыра түсті. Саяхатшының айтуынша, алгоритмдер оған Қазақстан туралы жазбаларды жиі көрсете бастаған.

"Бұл жігіттер Қазақстан туралы алғашқы әсерім болды және бұл өте жағымды әрі күтпеген жағдай еді. Олар бойымда елге деген қызығушылықты оята білді. Кейінгі айларда Қазақстан туралы қызықты жарияланымдарды жиі көре бастадым - әлеуметтік желі алгоритмдері өз ісін жасады", - деп атап өтті ол.

Instagram-дағы бұл жазбаны көру

A post shared by Nakib (@nvkib)

Алматыда оны не таңғалдырды?

Осы жазда нидерландық Алматыға келді. Оның көзіне түскен ең бірінші нәрсе - қаланың жап-жасыл болғаны.

"Мен Алматыға ұшып келіп, алғашқы күні-ақ қаланың қаншалықты тыныш әрі таза екенін байқадым. Көшелерде жасыл ағаштар мен жарқын гүлдер көп. Ал қаладағы гүл дүкендерінің саны! Сіздер гүлді шынымен қатты жақсы көреді екенсіздер. Бір сәтте мен қатар-қатар орналасқан он шақты гүл дүкені бар тұтас бір көшені көрдім", - деді ол.

Накибтің Алматы көшелерін аралап жүргенде байқаған тағы бір жайт қалаға емес, адамдарға қатысты. Оның айтуынша, өтіп бара жатқандардың қайсысы шетелдік, қайсысы жергілікті екенін ажырату оңай болмаған.

"Шетелдіктерді табу да өте қиын болды, өйткені олар жергілікті ортаға әбден сіңісіп кеткен. Кімнің шетелдік екенін ешқашан дөп басып айта алмайсың", - деп мойындады ол.

Қазақстаннан алған басты әсерлерінің қатарында Накиб жергілікті тұрғындарды, табиғат пен асхананы атады. Әсіресе, өмірінде жеп көрген ең дәмді шашлық есінде қалғанын айтты.

Instagram-дағы бұл жазбаны көру

A post shared by Nakib (@nvkib)

Сонымен қатар саяхатшы елде өзіне ұнамаған бірде-бір нәрсені есіне түсіре алмады.

"Маған ұнамаған ештеңені есіме түсіре алмаймын. Жаңа елге келгенде, әдетте барлық айырмашылықтарды байқайсың. Мен көптеген елде болдым және кей жерлерде маған бірдеңе ұнамаған кездер болды, бірақ Қазақстан жағдайында ондай ештеңе айта алмаймын", - деді ол.

Такси жүргізушісі оны тауға шақырған

Накибтің ең жарқын әсерлерінің бірі такси жүргізушісімен кездейсоқ танысуымен байланысты.

Сапар кезінде олар әңгімелесіп кеткен, ал біраз уақыттан кейін такси жүргізушісі оған хабарласып, тауға бірге баруды ұсынған.

"Жергілікті халық өте мейірімді әрі жақсы мағынада білуге құмар. Қазақстан әлі туристерге толып кетпегені көрініп тұр, сондықтан адамдардың шетелдіктерге деген қызығушылығы сақталған. Мен такси жүргізушісі болып жұмыс істейтін бір жергілікті жігітпен таныстым. Көлікте біраз сөйлестік, ал бір сағаттан кейін ол маған жазып, келесі күні таңертең бірге жорыққа шығуға келістік. Бұл мұндағы адамдардың қаншалықты қонақжай екенінің бір ғана мысалы", - деді Накиб.

Бұл жорық сапардың ең есте қаларлық сәттерінің бірі болды. Ол Қазақстаннан алған он басты әсерінің тізіміне Үлкен Алматы көліне қарай баратын құбыр бойындағы маршрутты қосты.

"Үлкен Алматы көліне қарай құбыр бойымен жаяу жүру менің үздік 10 әсерімнің қатарына нақты кіреді", - деді ол.

"Бізде тау жоқ, ал елдің жартысы теңіз деңгейінен төмен"

Накибтің Қазақстаннан алған әсерлері көбіне бұл елдің өз отанынан қаншалықты ерекшеленетіндігімен байланысты.

"Мен Нидерландыданмын - бұл өте кішкентай ел, оның жартысы теңіз деңгейінен төмен орналасқан және онда тау жоқ. Сондықтан басты айырмашылық - бұл, әрине, елдің көлемі мен ландшафты", - деп атап өтті ол.

Саяхатшы қазақстандықтардың өз еліне деген көзқарасына да назар аударды.

"Қазақстандықтар өз елін мақтан тұтады және бұл әбден орынды. Олар өте мейірімді және әрқашан көмекке келуге дайын", - деді Накиб.

Ол Қазақстанға келуге кімге кеңес береді?

Накиб Қазақстанға үйреншікті туристік маршруттарды емес, ерекше демалыс пен жаңа әсерлерді қалайтындарға келуге кеңес берді.

"Мен Қазақстанды үйреншікті туристік демалысты - мысалы, Жапонияға, Таиландқа немесе басқа да танымал туристік бағыттарға баруды - қаламайтын және шынайы ұмытылмас әсер алғысы келетіндерге ұсынар едім. Қазір Қазақстан саяхаттауға арналған ең үздік орындардың бірі болар", - деп бөлісті ол.

Накибтің өзі де елді бір сапарда толық көріп үлгермегендіктен, қайта оралуды жоспарлап отыр. Келесі жолы ол міндетті түрде қыста келуді қалайды.

Google News арқылы жаңалықтарымызды қадағалаңыз

Жазылу