Ұшқыштардың төбелесі және ұшақты басып алу туралы дабыл: Flydubai рейсінде не болды

Әуеде оқиға қалай өрбіді

Әуе кемелерінің қозғалысын бақылайтын Flightradar24 сервисінің деректеріне сәйкес, FZ 1073 рейсі Дубайдан Астана уақытымен сағат 08:49-да ұшып шыққан. Ұшқаннан кейін шамамен үш сағат өткенде экипаж апат дабылын берген. Бұдан соң ұшқыштар Израиль мен Иорданияның диспетчерлік қызметтерімен байланысқа шығуды тоқтатқан.

Оқиғаның мән-жайын талдаған РБК басылымының сарапшылары атап өткендей, экипаж алдымен төтенше жағдай туралы халықаралық белгі саналатын 7700 кодын жіберген. Көп ұзамай әуе кемесінің қызметіне заңсыз араласу немесе оны басып алу туралы хабарлау үшін қолданылатын 7500 коды іске қосылған. Осы кезде ұшақ биіктігін төмендете бастап, кейін Сауд Арабиясына қарай бағытын өзгерткен.

Авиация сарапшысы, RunAvia ұшу қауіпсіздігі сервисінің негізін қалаушы Андрей Патраков 7500 кодын бір түймені басу арқылы іске қосуға болатынын түсіндірді. Оның айтуынша, бұл экипажға борттық компьютерден тиісті функцияны іздеуге уақыт жұмсамай, жедел дабыл беруге мүмкіндік береді.

Ұшақ Иордания шекарасына жеткенімен, елдің әуе кеңістігіне кірмеген. Бұдан кейін экипаж кері бұрылып, Сауд Арабиясының солтүстік-батысындағы Табук қаласының әуежайына бағыт алған. Нәтижесінде әуе кемесі Сұлтан бен Абдулазиз әуежайына қонған.

Ұшақты сүйемелдеу үшін Израиль әскери-әуе күштерінің жойғыш ұшақтары әуеге көтерілген. Премьер-министр Биньямин Нетаньяху мен қорғаныс министрі Исраэль Кац шұғыл кеңес өткізген. Кейін премьер-министр кеңсесі жағдайдың бақылауда екенін және израильдік жолаушылардың қауіпсіз оралуы үшін барлық қажетті шара қабылданып жатқанын мәлімдеген.

Ұшақ бортында не болды

Ұшақ бортында 174 жолаушы, оның ішінде 27 бала болғаны белгілі.

Анықталғандай, ұшқыштар арасында жанжал шығып, соңы төбелеске ұласқан. Соның салдарынан төтенше жағдай коды іске қосылған. Әуе компаниясы ұшқыштар арасында жанжал болғанын растап, олардың бірі есінен танғанға дейін қақтығыс жалғасқанын нақтылады.

"Flydubai әуе компаниясы 30 қыркүйекте Дубай халықаралық әуежайынан Бен-Гурион халықаралық әуежайына бағыт алған FZ 1073 рейсінде оқыс оқиға болғанын растайды. Ұшақ Табук әуежайына аман-есен қонды. Барлық жолаушы қауіпсіз жерде, олардың өмірі мен денсаулығына қауіп төніп тұрған жоқ", – деп хабарлады Flydubai өкілі.

Ал кейбір БАҚ оқиғаға ұшқыштардың бірінің әдейі әуе апатын ұйымдастыруға әрекеттенуі себеп болғанын жазды.

Бұдан бөлек, кейін Telegram арналарының бірі жолаушының сөзіне сілтеме жасап, ұшқыштардың біріне пышақ жарақаты салынғанын хабарлады. Жолаушы әйелдің айтуынша, жолаушылар жағдайға араласып, оны бақылауға алуға көмектескен.

"Екі сағат бойы ұшақта айқай естідік. Ұшқышқа пышақ жарақаты салынған, біз көп қан көрдік", – деді жолаушы.

Соңғы мәліметтерге сәйкес, екінші ұшқыш Оман азаматы, ал әуе кемесінің командирі БАӘ азаматы болған. Бұған дейін БАҚ-та төбелеске қатысқандардың бірі Ресей, екіншісі Украина азаматы екені туралы ақпарат тараған еді.

Ұшқыштар кабинасында жанжал болған кезде ұшақ бортында қарапайым жолаушы ретінде ұшып бара жатқан тағы бірнеше ұшқыш болған. Олар әуе кемесін басқаруды қайта қолға алуға және оқиғадан кейін ұшақты тұрақтандыруға көмектескен.

2026 жылғы 28 қыркүйекте Франкфурттан (Германия) Лиссабонға (Португалия) ұшып бара жатқан Lufthansa рейсі пауэрбанктің өртенуіне байланысты Францияға бағытталғаны хабарланған еді.