Ұял және Сәлем сал Жетісайлық лабрадор қазақ тілін білуімен Қазнетті таңғалдырды

Челси есімді лабрадор Казнеттің жұлдызына айналды. Ит қазақ тіліндегі командаларға бірден жауап беріп, даладағы күшіктерге ерекше қамқорлық танытқан қысқа бейнероликтер әлеуметтік желіде мыңдаған қаралым жинап жатыр, деп хабарлайды Tengri Life.

Осыдан бес жыл бұрын Челсиді інісіне сыйға тартқан

Лабрадор Челси мен оның иесі Камаладин Абдуллаевтың достық хикаясы бес жыл бұрын басталған.

"2021 жылы әкеміз қайтыс болып, мен Челсиді ініме дос болсын деп Жетісайдан сыйлыққа алып келдім. Бірақ інім онымен бір айдай ойнап, кейін қызығушылығы азайды. Челси екі жасқа дейін кәдімгі ит сияқты өмір сүрді, көп уақытын қоршауда өткізді. Кейін оны аяп кетіп, тәрбиесімен және жаттығуымен белсенді айналысуды жөн көрдім", - дейді Камаладин.

Instagram-дағы бұл жарияланымды көру

Жарияланым авторы: Камаладин Абдуллаев (@labrachelsi)

Кейін иесі TikTok пен Instagram-да блог жүргізе бастап, үй жануары түскен видеоларды жүктейді. Тікелей эфирлерде оқырмандар Камаладиннің төрт аяқты досымен қазақ тілінде сөйлесетініне назар аударып, Челсиге командаларды ана тілінде үйретіп көруді ұсынады.

Instagram-дағы бұл жарияланымды көру

Жарияланым авторы: Камаладин Абдуллаев (@labrachelsi)

Бастапқыда Челси "отыр", "жат", "тұр" сияқты негізгі командаларды орыс тілінде меңгергенімен, жаңа нәтиже көп күттірген жоқ. Бұл идея өте сәтті болып шықты: ит жаңа командаларды тез үйреніп, оның әрекеті түсірілген роликтер Қазнетте тез танымал болды.

Instagram-дағы бұл жарияланымды көру

Жарияланым авторы: Камаладин Абдуллаев (@labrachelsi)

Челси үшін алғашқы қазақша командалар "Ұял" және "Сәлем сал" болды. Жаңа сөздерді толық меңгеріп, сенімді түрде түсіне бастауы үшін лабрадорға небәрі бір айлық тұрақты жаттығу жеткілікті болды.

Иесінің айтуынша, Челсидің басты қасиеті - жанашырлық пен мейірімділік.

"Челси күшіктегеннен кейін бір апта өткен соң серуенге шықтық, сол кезде даладағы күшіктердің қыңсылағанын естідік. Челси бірден оларға қарай жүгіріп барып, емізе бастады. Бізде мұндай видеолардың тұтас топтамасы бар - ол серуен кезінде үнемі дала күшіктерін тауып алып, оларға көмектесуім үшін маған көрсетіп тұрады", - деп бөлісті Камаладин.

Instagram-дағы бұл жарияланымды көру

Жарияланым авторы: Камаладин Абдуллаев (@labrachelsi)

Камаладин Абдуллаевтың өзі мамандығы бойынша заңгер. Ол 25 жаста, Жетісайда тұрады. Қазір жігіт кәсіби түрде ит үйретумен айналысады және өзге үй жануарларын тек қазақ тілінде жаттықтырады.

Әлеуметтік желідегі танымалдылығына, шенеуніктер мен кәсіпкерлердің назарына қарамастан, Камаладиннің әзірге өз баспанасы жоқ. Ол үй жануарларымен бірге пәтер жалдап тұрады және бірнеше итпен бір үйден екінші үйге көшу кезінде жиі қиындықтарға тап болады.

Осыған қарамастан, ол алған бетінен қайтпақ емес. Камаладиннің алдағы жоспарында - жануарларға арналған панажайлар ашу және ауру әрі қараусыз қалған жануарларды құтқару бар.

Google News арқылы жаңалықтарымызды қадағалаңыз