Оксфордта қазақ тілін оқыта бастады

Дүниежүзіне танымал Ұлыбританиядағы Оксфорд университетінде қазақ тілі оқытыла бастады. Ана тілімізді үйренушілер қатарында шетелдік тіл мамандары, Орталық Азияны зерттеуші болашақ ғалымдар және ұлтымыздың бай мәдениеті мен дәстүріне қызығушылығы жоғары студенттер бар. 

Ғалымжан Қараманұлы, тілші:

- Оксфорд — әлемде беделі биік университеттердің бірі. Ол ғасырлар бойы ғылыми жаңалықтар ашып, жер-жаһанды өзгерткен түлектерді тәрбиелеп келеді. Енді білім ордасы оқу кестесіне қазақ тілін де қосып отыр. Бұл – еліміз бен ана тіліміздің ең жоғары академиялық деңгейде мойындалғандығын тағы бір дәлелдейді.

Қанатқақты жобаның жүзеге асуына Қазақстан Республикасының Ғылым және жоғары білім министрлігі, Ахмет Байтұрсынұлы атындағы Тіл білімі институты және Оксфорд университетіне қарасты «Бір сөз» бастамасы ұйытқы болды. Қазақ тілі қосымша сабақ әрі зерттеу жобасы ретінде жүргізіле бастады.

Дидар Садық, Оксфорд университетінің қазақ тілі пәні мұғалімі:

- Біздің негізгі жоспарымыз, А1, яғни ең базалық деңгейден бастап, Б1 деңгейіне дейін жеткізу. Академиялық жылдың соңында Б1 деңгейіне жеткен студенттердің тілді меңгеру деңгейін байқап, қорытынды шығаруымызға болады.

«Сабақтардың басталғанына бір ай ғана өтті. Сондықтан студенттердің нәтижесі туралы айту әлі ерте. Бір жылдан кейін ғана қорытынды жасауға болады», - дейді мамандар. Алайда қазірдің өзінде шетелдіктердің аяқ алысы жаман емес.

Шербан, Оксфорд университетінің студенті:

- Менің атым Шербан. Мен Англияда тұрамын және мен Оксфорд университетінде студентпін. Қазір мен қазақ тілін үйреніп жүрмін. Себебі менің ойымша өте әдемі тіл.

Джейкоб, Оксфорд университетінің студенті:

- Мен тілді қазақ жазушыларының шығармаларын түсіну үшін үйреніп жүрмін. Оларды түпнұсқада оқығанға ештеңе жетпейді деп ойлаймын.

Жобаға Ұлыбритания, АҚШ, Румыния және басқа да елдерден оншақты шетелдік студент қатысып жатыр. Барлығы да ғылыми ізденісте жүрген жастар. Дәрістер Азия және Таяу Шығыс факультетінде жүреді. Жоба барысында Оксфордтың тілді үйретуге арналған классикалық методикасы қолданылады. Шетелдіктер сенбі сайын сөйлеу клубына қатысады. Олар бұл жерде сөйлеу дағдысын жетілдіріп қана қоймай, ұлттық тағамдар жасап, салт-дәстүрлерімізді меңгереді.

Ләйлә Сұлтанқызы, Қазақ мәдени орталығының мүшесі:

- Қазақ тілін дәм арқылы, мәдениет арқылы, музыкасы арқылы есту, білу түсіну деген сияқты, яғни жалпы қазақтың болмысын түсіну үшін осындай спикинг клабтарды, Тіл-тайм деп атаймыз, Қазақ қауымдастығымен бірге өткіземіз.

Игі бастама келесі академиялық оқу жылында да жалғасын табады деген жоспар бар. Оқу материалдары жетілдіріліп, қателіктермен жұмыс жүргізіледі. Екінші жыл сөйлеуге, тыңдауға, оқылым дағдырларын жетілдіруге басымдық берілмек. 

Авторы: Ғалымжан Қараманұлы