Алматы облысында қазақ тілін оқыту сапасы талқыланды

Алматы облысында қазақ тілі мен әдебиеті пәні мұғалімдерінің облыстық Тіл форумы өтті.

Шараға өңірдің білім беру ұйымдары мен тіл оқыту орталықтарынан 150-ге жуық маман қатысты. Педагогтер кәсіби біліктілікті арттыру, оқыту әдістемесін жетілдіру және цифрлық технологияларды қолдану мәселелерін талқылады.

Форумға Алматы облысының ұстаздары мен тіл саласының жетекші мамандары жиналды. Шара екі бөлімнен тұрды: TED X форматына негізделген пленарлық отырыс және тәжірибе алмасуға арналған секциялық сабақтар. Форумға жиналған тіл мамандары мен ұстаздар қауымының мақсаты бір. Олар аталған жиында қазақ тілін оқыту сапасын арттырудың жолдарын қарастырды.

Даря Ерболатқызы, қазақ тілі мен әдебиеті мұғалімі:

- Мен функционалдық сауаттылық секциясында спикермін. Оқушылардың қай мектепте, қалай жұмыс жүргізіліп жатқандары қызықты және ЖИ-пен жұмыс жүргізу, қазақ тілімен бірлесе отырып, осындай тақырыптар маңызды болып тұр.

Қатысушылардың айтуынша, форум шығармашылық әлеуетті арттыруға, оқушылардың оқу сауаттылығын күшейтуге бағытталған нақты әдістемелерді меңгеруге мүмкіндік береді. Бұл Тіл форумының облыста екінші мәрте өткізілуі. Биыл шараға 150-ден аса педагог қатысты.

Салтанат Беспаева, Алматы облысы Тілдерді дамыту басқармасының басшысы:

- Балаларға қазақ тілі және әдебиет пәні мұғалімдері заман талабына сай дәріс беруі керек. Бүгінгі форумның негізгі мақсаты - осындай форумдар арқылы мұғалімдерге әдістемелік көмек бере отырып, қазақ тілінің тазалығын сақтау.

Рауан Кенжеханұлы, Халықаралық Qazaq tili қоғамының президенті:

- Егер білім беру жүйесінде тілді оқыту жұмысы дұрыс жолға қойылып, түлектеріміз қазақша сауатты сөйлеп, әдемі жазып шыға алса, онда басқа салалардағы тілдің қолданысы тиісті деңгейде болады. 

Шара барысында қазақ тілін дамытуға үлес қосқан ғалымдар мен тіл жанашырлары марапатталды. Ұйымдастырушылар Тіл форумын жыл сайын өткізіп, қазақ тілін оқыту сапасын одан әрі арттыруды көздеп отыр.

Авторлары: Гүлім Советқан, Аят Дүйсембай, Аманжол Жөңкешов