В. Зеленский мен Д. Трамп кездеседі. LIVE

Бүгін Владимир Зеленский Флориданың Палм Бич қаласында Дональд Трамппен кездеседі.

Жиында қос тарап Украинадағы соғысты тоқтатудың соңғы түйінді мәселелерін талқылайды. Осыған дейін Вашингтон тарапы 20 бөлімнен тұратын бітім жоспарын ұсынып, оған Киевтің 90% келіскенін айтқанбыз. Ендігі түйткіл қауіпсіздік кепілдігі мен жер мәселесі болып отыр. Бірер сағаттан соң басталатын жиынға дейінгі ахуал қалай?

Ердана Ержанұлы, тілші:

- Армысыз! Батыстық БАҚ өкілдері Киев өңіріндегі әскери қақтығыспен қатар Трамппен кездесу алдындағы Зеленскийдің Канадаға баруын да талқылап жатыр.

Канада, Халифакс

Украина президенті кеше Атлант мұхитын кесіп өтіп, Канаданың шығысында орналасқан Халифакс қаласында, сол елдің премьер-министрі Марк Карнимен кездесті. Канадалық саясаткер Украинаға 2.5 млрд доллар көлемінде экономикалық көмек беретінін хабарлады. Осылайша Оттава Киевке көмектескен үлкен жетілік елдерінің ішіндегі ең ірі демеуші болып отыр. Соңғы төрт жылда канадалық қолдау 22 млрд долларға жуықтаған. Және осы кездесуге дейін Президент Зеленский АҚШ-пен талқыланытын мәселелердің бірқатарын, әсіресе, Украинаның 2040 жылға дейінгі ұзақ мерзімді өркендеуіне арналған жол картасын АҚШ-пен бірге әзірлеп жатқанын Х желісінде былай деп баяндады.

Украинаны қалпына келтіру үшін $700-800 млрд қажет

ЦИТАТА

Владимир Зеленский, Украина Президенті

“Бұл құжатта ұлттық даму мақсаттары, халықтың өмір сүру ұзақтығын арттыру, босқындардың елге қайтып оралуы, жан басына шаққандағы Ішкі жалпы өнімнің өсуі, жаңа жұмыс орындарын құру, қауіпсіздік кепілдіктері секілді басым бағыттар қамтылған. Сонымен қатар халықаралық нарықтарға қол жеткізу және Еуропалық одаққа мүшелікке өту перспективасы да назарда. Макроэкономикалық тұрақтылықты қамтамасыз етуге арналған нақты мақсаттар мен стратегиялар белгіленген. Алдын ала бағалау бойынша, елді қалпына келтіруге 700–800 миллиард доллар көлемінде инвестиция қажет”. 

Ердана Ержанұлы, тілші:

- Осының бәрін жүзеге асыру үшін бірнеше қор құрылатынын, ол мақсатта АҚШ-пен серіктестіктің маңыздылығын атады. Әрине экономикалық қиындықтар Вашингтонмен келісіп шешетін жалғыз мәселе емес. 

Трамп-Зеленский кездесуі не жайлы болады?

АҚШ, Флорида

Осыдан біраз бұрын Аксиос арнасына берген сұхбатында Зеленский АҚШ-тың Украинаға ұзартылуы мүмкін 15 жылдық қауіпсіздік кепілдігін ұсынғанын айтқан еді. Алайда Киев “15 жылдан да ұзағырақ әрі заңмен бекітілген қорғанысты” қалайтынын алға тартқан. Бұл тақырып бүгінгі кездесуде талқылануы әбден мүмкін. Оны да бақылауға аламыз. Сондай-ақ аталған 20 бөлімдік бейбітшілік жоспарында “НАТО-ға ұқсас” қауіпсіздік кепілдігі де кеңінен сөз болып жүр. Яғни 5-артикль қағидасына ұқсас форматта “Украинаға шабуыл күллі НАТО-ға шабуыл ретінде қабылданады” деген ұғымды тілге тиек еткендер көп. Бірақ оның бағанағы 90% келісілген мәміленің ішіне кірген-кірмегені әзірге белгісіз. Себебі ең басты мәселе Украинаның аумақтық тұтастығы болып отыр. Атап айтқанда, Луганск пен Донецк аймақтары. Вашингтон сол жерде “еркін экономикалық аймақ құру” ұсынысын алға тартып, жағдайдың тігісін жатқызып көргісі келген. Дегенмен, бұл жөнінде де толық ақпарат ресми жарияланбады. 

Ердана Ержанұлы, тілші:

- Сондай-ақ Зеленский Трамппен жер мәселесін, қауіпсіздік кепілдігін өзі қалағандай бір жақты келісе алмаса, 20 бөлімнен тұратын жоспарды, әсіресе, жер мәселесін халықтық референдумға салатынын айтты. Әйткенмен, оған дайындалып, дауыс жиналуы үшін соғыс әрекеттері 60 күнге тоқтауы керек деген талап та бар екендігі мәлім болды. Және үшінші түйткілді мәселе Запорожье атом электр станциясының тағдыры болып отыр. 

АҚШ, Флорида

Бір аптадан бері Дональд Трамп Вашингтонның суығынан кетіп, Флоридадағы Мар-а-Лаго атты жылы резиденциясында жатыр. Рождество мерекесін, маңызды кездесулерді сол жақта өткізді. Және Украина-Ресей арасындағы бейбітшілік келісіміндегі соңғы сөз тек менде болады деп шорт кесіп отыр. Ақ үй кездесу Астана уақытымен бүгін түнгі 23:00-де басталатынын мәлімдеді.