Венгрия дауыс беру құқығынан айырылуы мүмкін Еуропарламент депутаты

АСТАНА, 7 сәуір – Sputnik. Еуропалық Одақ Венгрияны Еуроодақ кеңесінде дауыс беру құқығынан айыруды жоспарлап отыр. Бұл шешім 12 сәуірге жоспарланған парламенттік сайлауда қазіргі премьер-министр Виктор Орбан жеңіске жеткен жағдайда қабылдануы мүмкін, деп есептейді Еуропарламенттегі Украина-ЕО парламенттік ынтымақтастық комитетінің төрағасы Пекка Товери.

Биыл 18 ақпанда Венгрия Украинаға дизель жеткізуді тоқтатты, ал 20 ақпанда Еуроодақтың Киевке бөлген 90 миллиард еуро көлеміндегі кредитін Ресейден мұнай тасымалы қайта басталғанға дейін бұғаттады.

Венгрияның сыртқы істер министрі Петер Сийяртоның айтуынша, бұл шешім Киев билігінің саяси себептермен "Дружба" мұнай құбыры арқылы ресейлік мұнай транзитін қайта бастамауына жауап ретінде қабылданған. Оның айтуынша, Украина осылайша елде энергетикалық дағдарыс туғызып, сәуірдегі сайлауға ықпал еткісі келеді.

"Кредит беру туралы шешімді бекіту үшін Венгрияның ЕО кеңесінде дауыс беру құқығы қайтарып алынуы әбден мүмкін. Нақты мерзімін айта алмаймын, бірақ сайлаудан кейін көп ұзамай шешім қабылданады", - деді Товери "Известия" газетіне берген сұхбатында.

Венгрия билігі Украина елдегі сайлау науқанына араласып жатыр деп бірнеше рет мәлімдеді. Олардың пікірінше, Киев сәуірдегі сайлауда оппозициялық "Тиса" партиясының жетекшісі басқаратын үкіметті билікке әкелуге тырысып жатыр. Бұл үкімет венгр қаржысын Украинаға бөлуді және Украинаның Еуроодаққа жедел қосылуын қолдауы мүмкін.