Вето мырза боламын Ақ үй АҚШ Сенатының демократтардың бақылауына өтуі мүмкіндігіне дайындалуда

Ақ үй өкілі мен осы жоспарлардан хабардар екі дереккөздің мәлімдеуінше, АҚШ президенті Дональд Трамптың әкімшілігі Конгресс демократтардың бақылауына өткен жағдайда, елді заң шығарушы органды айналып өтіп басқару жоспарларын бірнеше ай бойы әзірлеген, деп хабарлайды Tengrinews.kz Reuters агенттігіне сілтеме жасап.

Трамп демократтармен ымыраға келгенге дейін "бір-екі ай" вето құқығын пайдалануға дайын екенін мәлімдеді.

"Меніңше, мен "Мистер Ветоға" айналатын шығармын. Ал кейінірек, белгілі бір уақытта, біз мәмілелер жасай бастаймыз", - деді Трамп The New York Post газетінің Pod Force One подкастына берген сұхбатында.

Конгресті бақылауға алу демократтарға Трамптың қызметіне тергеу жүргізуге, заң жобаларын бұғаттауға және оның шығыстар бойынша басымдықтарын шектеуге мүмкіндік береді.

Дегенмен, Трамп сауда, сыртқы саясат және федералды бюрократия саласындағы кең атқарушылық өкілеттіктерін сақтап қалады, бұларды ол өзінің екінші мерзімінде белсенді түрде қолданып келеді.

Нарық бұл жаңалыққа құлдыраумен жауап берді: S&P 500 индексі 2 пайызға жуық, ал Nasdaq 3 пайызға жуық төмендеп, 5 маусымнан бергі ең ірі бір күндік құлдырауды тіркеді.

Ақ үй өкілінің айтуынша, аса маңызды пайдалы қазбалар мен жел турбиналарының импортына жаңа баж салығын енгізу, шетелдік студенттер мен уақытша жұмысшыларға арналған виза ережелерін қатаңдату, сондай-ақ тұрғын үй мен құрылыс құнын төмендету шаралары талқыланып жатыр.

"Бұл әкімшілік және парасатты республикашылдар шекарамыздың қауіпсіздігін қамтамасыз етуді, заң мен тәртіпті қалпына келтіруді, еңбекқор америкалықтардың қалтасына көбірек ақша қайтаруды және Америка халқына жеңіс сыйлауды жалғастырады", - деді Ақ үйдің баспасөз хатшысы Лорен Бис.

Демократтар республикашылдардан басым түсуі үшін Өкілдер палатасы мен Сенатта қосымша төрт-төрттен орын алуы қажет (сәйкесінше 218-ге қарсы 214 және 53-ке қарсы 47). Сауалнамалар төменгі палатада демократтардың жеңісін болжағанымен, Сенаттағы нәтиже әзірге белгісіз.

Ақ үй республикашылдардың жеңілу сценарийін жоққа шығарып, БАҚ-ты жалған ақпарат таратып жатыр деп айыптады.

Өкілдер палатасындағы әлеуетті демократиялық көпшілік Трамптың билікті жеке мүддесіне немесе жақтастары мен демеушілерінің мүддесіне пайдаланған-пайдаланбағанын тексеру үшін тыңдаулар, шақыртулар мен құжаттарды сұрату шараларын дайындап жатыр.

Трамп командасы мұндай оқиғалар желісіне бірнеше айдан бері дайындалып жатыр. Дереккөздердің айтуынша, Ақ үй заңгерлері саяси тағайындалған тұлғалар мен ведомство басшыларына Конгресс сұраулары мен шақыртуларына қалай жауап беру керектігін үйретіп, хат алмасуда сақ болуды ұсынған. Сондай-ақ президенттің кеңесшілерімен жеке байланысын қорғау үшін Әділет министрлігінің қорытындысын алуға тырысып жатыр.

Бізді Google-дың негізгі дереккөздер тізіміне қосыңыз