VR технология жұмыссыздарды еңбек нарығына дайындайды

— VR — заманауи технология. Сондықтан оны пайдалана отырып, жаңа мамандықтарды үйретуді жөн санадық. Бастапқыда 5 мамандық бойынша курстар жұмыс істейді. Оның ішінде токарь, дәнекерлеуші, слесарь, еңбек қауіпсіздігі маманы бар. Пилоттық жобаны жұмыс іздеп жүрген азаматтар үшін іске қосқалы жатырмыз. Әрі қарай кері байланыспен жұмыс істеп, бастаманы дамытамыз, — деді біліктіліктер мен құзыреттерді цифрлық дамыту департаментінің директоры Динара Мұратқызы Jibek Joly телеарнасының «Бүгін Live» бағдарламасында.

Жоба аясында оқыту дәстүрлі форматпен шектелмей, заманауи технологиямен толықтырылады. VR көзілдірігі арқылы пайдаланушы өзін нақты өндірістік ортада жүргендей сезініп, жаңа тәжірибе жинақтайды.

— Астана, Алматы қалалары, ШҚО, Түркістан, Маңғыстау облыстарында «Мансап» орталығына барып, оқытудан өтуге болады. Жұмыссыз азаматтарғатегін, кейін сертификат беріледі, — деді спикер.

Яғни, теориялық бөлім аяқталғаннан кейін оқыту «Мансап» орталықтарында жалғасады. Онда VR-шлемдердің көмегімен қатысушылар алған білімдерін бекітіп, кәсіби дағдыларды өндірістік жағдайға барынша жақын ортада пысықтайды.

Айта кетейік, елімізде биылғы жыл «Цифрландыру және ЖИ жылы» деп жарияланды.