Заңсыз жекешелендірілген активтер: Қазақ энциклопедиясының 100% үлесі мемлекетке қайтарылды

Алматы қаласының прокуратурасы «Қазақ энциклопедиясы» ЖШС-нің 100 % үлесін бұрын ҚР Мәдениет және спорт министрі болған А.Мұхамедиұлымен байланысты компанияның заңсыз иелігінен мемлекетке қайтарды.

Ведомствоның хабарлауынша, 2015 жылы «Қазақ энциклопедиясы» ЖШС-нің 100 % үлесі жылжымайтын мүлік түріндегі активтері заңсыз иеліктен шығарылған, жеке заңды тұлғамен заңсыз жекешелендірілген. Атап айтқанда, Алматыдағы Әуезов ауданында орналасқан ауданы 2 108,3 м2 болатын жер учаскесі бар ғимарат жеке қолға өткен.

Мемлекеттің мүліктік мүдделерін қорғау мақсатында Алматы қаласы Әуезов ауданының прокуратурасы жекешелендіру шартын және одан кейінгі мәмілелерді жарамсыз деп тану туралы сотқа талап-арызбен жүгінген.

"Кассациялық соттың қаулысымен прокуратураның талап-арызы толық көлемде қанағаттандырылды, құны 1,3 млрд теңге болатын актив мемлекетке қайтарылуға жатады", - деп мәлімдеді Алматы қаласының прокуратурасы. 

Еске сала кетейік, бұрынғы Мәдениет және спорт министрі Арыстанбек Мұхамедиұлы бұған дейін бюджет қаражатын талан-таражға салғаны және рейдерлік әрекеттері үшін ұзақ мерзімге бас бостандығынан айыру жазасына кесілген болатын. Осымен қатар, құқық қорғау органдары мен прокуратура оның және онымен байланысты тұлғалардың заңсыз шығарған активтерін мемлекетке қайтару бойынша жұмысты жалғастыруда.

Бүгін, 11:30