Зеленский Украина Донбастан қандай жағдайда әскерін шығаратынын айтты

Зеленский Украинаның Донбастан әскер шығару мәселесін талқылауға дайын екенін, бірақ ол үшін Ресей де соған ұқсас қашықтыққа шегінуі тиіс екенін мәлімдеді, деп хабарлайды Arasha.kz.

Украина президенті бұл туралы Axios басылымына берген сұхбатында айтты. Зеленскийдің сөзіне қарағанда, украин халқы Донбастан әскерді біржақты шығаруды көздейтін бейбіт келісімді қабылдамайды. Ол аумақтық мәселелер бойынша ілгерілеуге Путинмен жеке кездесуде қол жеткізуге болатынын тағы да атап өтті.

Сондай-ақ Зеленский Уиткофф пен Кушнердің өзіне Ресей қақтығысты тоқтатуды «шын ниетімен қалайтынын» жеткізгенін айтты. Ол америкалық келіссөз жүргізушілерге Украина халқы «сәтсіздік» деп қабылдайтын бейбіт реттеу жоспарын өзіне «өткізуге тырыспауды» кеңес берді.

Америкалық делегация Донбасты демилитаризацияланған «еркін экономикалық аймаққа» айналдыруды ұсынды, бірақ ол жердегі егемендік кімге тиесілі болатынын нақтыламады. Сонымен қатар АҚШ пен Украина кез келген келісім міндетті түрде украиналық референдумға шығарылуы тиіс деген ортақ шешімге келді. Зеленскийдің айтуынша, қазірше тараптар атысты тоқтату режимі орнаған жағдайда оның сақталуын Америка Құрама Штаттарының басшылығымен дрондар арқылы қадағалау туралы келіскен. 

«Егер біз құжатқа қазіргі майдан шебінде қалатынымызды жазсақ, халық референдумда бұны қолдайды деп ойлаймын. Бұл менің жеке пікірім», - деді Зеленский.