Біз Тәуелсіздігімізден айрылсақ... Зеленский Украина тарихындағы болмаған жайтты ашып айтты

Украина президенті Владимир Зеленский Польшаға қорғаныс саласындағы ынтымақтастықты ұсынды. Атап айтқанда, украин әскери мамандары дрондардан қорғану бағытында тәжірибелік және техникалық көмек көрсетуге дайын екенін мәлімдеді. Бұл туралы ол Варшавада Польша президенті Кароль Навроцкиймен өткен бірлескен баспасөз мәслихатында айтты, деп жазады Arasha.kz.

Deutsche Welle басылымының жазуынша, 19 желтоқсанда өткен кездесуде Зеленский Украинадағы соғыстың әділетсіз аяқталуы Еуропа қауіпсіздігіне тікелей қатер төндіретінін ескертті. Оның айтуынша, Украинаның тәуелсіздігі тек Киев үшін ғана емес, Польша үшін де стратегиялық маңызға ие.

"Егер біздің мемлекет тәуелсіздігінен айырылса, Мәскеу міндетті түрде алға жылжиды. Онда Украинадан кейін Польшаға, әрі қарай Еуропаға қауіп төнеді. Сондықтан Украина да, Польша да бар болуы керек. Ең бастысы – біз бірге болуымыз керек", – деді Украина басшысы.

Зеленский соңғы жылдары Украинаның соғыс жағдайында мол тәжірибе жинақтағанын атап өтті. Оның сөзінше, ел қорғаныс технологиялары мен қару-жарақ өндірісі саласында едәуір ілгеріледі. Әсіресе, Ресейдің ұшқышсыз ұшу аппараттарынан қорғану бағытындағы әзірлемелерін Польшаға ұсынуға дайын екенін жеткізді. Айта кетейік, бұған дейін ресейлік дрондар Польша аумағына бірнеше рет кіріп кеткен болатын.

Сонымен қатар, Украина президенті Кароль Навроцкийді Украинаға ресми сапармен келуге шақырды. Бұл сапар барысында Польша басшысы украин әскери-өнеркәсіп кешенінің мүмкіндіктерімен және қорғаныс әлеуетімен таныса алады.

Өз кезегінде Польша президенті ұсынылған ынтымақтастыққа оң баға берді. Ол Польша қарулы күштерінің иелігіндегі МиГ-29 жойғыш ұшақтарын Украинадан алынатын антидрон жүйелеріне айырбастау мәселесі қарастырылып жатқанын айтты. Сарапшылардың бағалауынша, Польшада қазіргі таңда 10-нан 15-ке дейін МиГ-29 ұшағы бар.