Зергерлік бұйымдар саудасы саябырсыды

Биыл әлемдік инвесторлардың жиғаны алтын, тергені күміс болды. Сұраныстың артуына байланысты, баға жыл басынан бері қымбаттап келеді. Жылтыраған жақұт қауіпсіз активке айналды. Десе де оның қоры түгесіліп барады деп америкалық геологтар дабыл қағып отыр. Ал нарықта кейінгі бірнеше аптада бағаның сәл түскені байқалады.

Келер жылы алтын бағасы 5000 долларға жетуі мүмкін. Bank of America қаржыгерлері осындай болжам жасады. Алтын бағасы осыған дейін АҚШ президенті Дональд Трамп Қытайдан келетін тауарларға 100 пайыздық баж салығын енгізетінін мәлімдегеннен кейін күрт өскен болатын. Инвесторлар АҚШ пен Қытай арасындағы сауда соғысы қайта басталуы мүмкін деп қауіптенеді. Егер тараптар арасында жағдай ушықса, алтын қауіпсіз актив ретінде тартымды бола түседі. Өйткені баға шарықтайды. Алайда алтынның қымбаттауы кей елде зергерлік бұйымдар нарығына кері әсер етті. Мәселен, Қытайда одан жасалған әшекейлер саудасы едәуір саябырсыған. 

Янь Лисяофэн, зергерлік дүкен иесі:

- Кейінгі уақытта алтын бағасы шарықтап тұр. Бұл зергерлік әшекейлерге деген сұранысты азайтты. Алтын бұйымдар қымбаттаса, сатып алушылар азаяды. Бұрын  үш грамм алтын бұйымды 1000 юаньға сатып алатын.  Енді бұл ақшаға 1 граммдық бұйым ғана келеді. 

Индонезияда инфляцияның өсуі мен ұлттық валютаның әлсіреуі инвесторлар арасында дүрбелең туғызды. Сондықтан, алпауыт компаниялар үшін қазірде алтын қолайлы инвестиция көзіне айналып отыр. Халық ішінде де зергерлік бұйымдарға сұраныс жоғары. Өйткені, мұнда тойға әдетте алтын сыйлайды.  

Зульфинур Хадинанто, Джакарта тұрғыны:

- Ақша бар кезде, баға көтерілмей тұрып сатып алып қойғанмын. Баға әбден көтерілгенде, қайта сатамын. 

Күміске сұраныс артты. Алтыннан арзан болса да, күмістің экономикадағы, ақша-несие саясатындағы дәрежесі басым. Жыл басынан бері бұл металлдың бағасы 73 пайызға өсіп, алғаш рет 50 доллардан асты. Мұндай көрсеткіш кейінгі 45 жылда болмаған. Алайда күміс қоры сарқылып барады. АҚШ Геологиялық қызметінің мәліметі бойынша, кейінгі 10 жылда кен өндіру 30 пайыз төмендеген. Осы себепті амеркиалық геологтар күмісті «стратегиялық маңызды металл» ретінде танып, экономикалық және ұлттық қауіпсіздік үшін маңызды минералдар тізіміне енгізуді ұсынды. 

Авторлары: Зайнұр Байжігіт, Фариза Жанғанаева