Жағдайды ушықтырып барады : Физика, химия, биологияны біріктіріп оқыту керек пе?

Мәжіліс депутаты, бұрынғы математика пәнінің мұғалімі Мұрат Әбенов 2026-2027 оқу жылынан бастап енгізілмек болған жаңа мектеп реформасын қатаң сынға алды. Оның айтуынша, Оқу-ағарту министрлігі физика, химия және биология пәндерін "жаратылыстану" деген бір пәнге біріктірмек болған, ал алгебра мен геометрия "математика" болып оқытылуы тиіс еді, деп жазады Arasha.kz.

«Бұл өзгеріс оқушылардың білімін одан сайын әлсіретеді»

Әбеновтің пікірінше, мұндай реформа қазақстандық оқушылардың жаратылыстану-математика бағытындағы дайындық сапасын толықтай құлдыратады. Ол 2022 жылы физика, химия және биология сағаттарының аптасына 6-дан 5-ке қысқарғанын еске салды. Нәтижесінде оқу бағдарламасынан маңызды тақырыптар алынып тасталды, лабораториялық жұмыстар мүлдем жоғалды.

«Мен мемлекеттік гранттарды бөлу комиссиясында 5 жыл жұмыс істеп келемін. Техникалық мамандықтарға бала бармайды. Себебі — жаратылыстану-математикалық пәндер бойынша білім әлсіз. Бірақ білім жүйесі қателіктерді түзетудің орнына, керісінше жағдайды ушықтыруда», — дейді ол.

Реформаның артында кім тұр?

Депутаттың айтуынша, реформаны Назарбаев Зияткерлік мектептері (NIS) мен Назарбаев Университетінің өкілдері дайындаған. Алайда олар ешқашан қарапайым мектепте жұмыс істемеген. Онда жағдай мүлде басқа: толық күндік оқу, екі ауысым мұғалім, қымбат зертханалық жабдықтар. Ал елдегі 8 мыңнан аса қарапайым мектепте бұл мүмкіндіктер жоқ.

Әбеновтің есептеуінше, реформа қабылданса:

оқулықтарды қайта жазу қажет,

100 мың мұғалімді қайта оқыту керек,

шамамен 20 мың педагогтің жүктемесі қысқарады немесе олар жұмыстан кетеді,

ҰБТ форматы мен ЖОО бағдарламаларын өзгерту қажет болады.

«Жаңа министрмен сөйлестім. Бұл асығыс және ойластырылмаған реформа. НИШ-тен келген бірнеше теоретик өз бағдарламаларын таңып отыр. Мен олардың мұны тегін істемейтініне сенімдімін: қолдарында НИШ-ке арнап жазылған жеке оқулықтар, мұғалімдерді қайта даярлау курстары дайын тұр. Тіпті онлайн сабақтар ұсынып, соның ақшасын жеке қалталарына түсірмек пе деген күдік бар», — деді депутат.

Реформа тоқтатылды, бірақ қаражат жұмсалып қойған

Әбеновтің айтуынша, жаңа Оқу-ағарту министрі Жұлдыз Сүлейменова Алтынсарин атындағы Білім академиясының директорын және оның НИШ-тен келген орынбасарын қызметтен алып, даулы реформаны енгізуді уақытша тоқтатқан. Қазір бұл бағдарлама тек кейбір мектептерде эксперимент ретінде ғана сынақтан өтпек.

Депутат бұл реформаны толықтай тоқтатуды қолдайды.

«Мен толықтай тоқтатуды қолдаймын. Бірақ регламент бойынша мүмкін емес: егер бұл бағдарлама алынса, оның орнына дайын басқа жоба жоқ. Ал Академия қаржыны әлдеқашан жұмсап қойған, оны жоққа шығару — бюджеттің шығынын мойындау деген сөз», — деді Әбенов.