Жаңа мұнай өңдеу зауыты Ұлытау облысында салынуы мүмкін вице министр

АСТАНА, 11 ақпан – Sputnik. Қазақстанның энергетика вице-министрі Қайырхан Тұтқышбаев республикалық төртінші мұнай өңдеу зауытының құрылысына қатысты сұрақтарға жауап берді.

Оның айтуынша, зауытты салуға тұтынудың өсіп келе жатқаны себеп болып отыр.

"Шынында, қазіргі уақытта зауытты салудың бірнеше нұсқасы қарастырылып жатыр. Ол Ұлытау облысында салынуы ықтимал, ал сарапшылар қауымы тиісті есептеулер жүргізіп жатыр. Сондықтан техникалық мәліметтер, сипаттамасы мен орналасқан жері анықталған соң қосымша хабарланады", – деді Тұтқышбаев.

Болашақ мұнай өндіру зауытын қаржыландыру мәселесі де әзірге белгісіз болып отыр.

"Алдын ала жоспар бойынша зауыт жылына 10 млн тонна мұнай өңдейді, экономикасы мен орналасқан жері бойынша қосымша хабарланады", – деді вице-министр.

Кеше Қасым-Жомарт Тоқаев жаңа мұнай өңдеу зауытын салу үшін жеке инвесторларды тарту қажеттігін айтқан болатын.

"Бүгінде мұндай жобаларды тек мемлекет қаражаты есебінен жүзеге асыру аса тиімді емес", – деді президент.

Сонымен қатар ол қолданыстағы зауыттарды жаңғырту жұмыстарын жеделдетуді тапсырды. Қазіргі уақытта елімізде үш зауыт бар – Атырауда, Шымкентте және Павлодарда.

"Қазақстанда жылына шамамен 100 млн тонна мұнай өндіріледі, бірақ 18 млн тоннасын ғана өңдей аламыз. Соның салдарынан, мұнай өндіретін ел бола тұра, біз әр жыл сайын дизель отыны тапшылығын сезінеміз, ал авиациялық керосинге тәуелділігіміз жоғары", – деді Тоқаев.

2025 жылдың қазанында премьер-министр Олжас Бектенов үкіметтің төртінші мұнай өңдеу зауытын салу жоспары барын хабарлаған еді. Сондай-ақ ол болашақ нысан үшін бірден төрт аймақ қарастырылып жатқанын айтты.