Жаңа өндіріс, жаңа мүмкіндіктер: Қазақстандағы ірі жобалар

Үкіметтің баспасөз қызметінің мәліметінше, индустриялық инвестициялық жобаларды жүзеге асыру нәтижесінде өнеркәсіп саласында 30 мыңнан астам жұмыс орны пайда болады, –  хабарлайды Aikyn.kz.

Қазақстан экономикасының тұрақты дамуы мен халықты жұмыспен қамту – елдің бүгінгі басты мақсаттарының бірі. Осы мақсатқа қол жеткізу үшін индустриялық инвестициялық жобаларды іске асыру арқылы жаңа өндіріс орындарын ашу, экономиканы әртараптандыру және шикізатқа тәуелділікті азайту маңызды рөл атқарады.

Президент тапсырмаларын іске асыру жолында Үкіметке жүктелген негізгі міндеттердің бірі – экономиканы әртараптандыру мен қайта өңдеу саласын өркендету. Негізгі басымдық – тек шикізат сатуға сүйенбей, жоғары қосымша құн әкелетін, тұрақты жұмыспен қамтуды және тұрақты экспортты қамтамасыз ететін жаңа өндіріс ошақтарын қалыптастыру.

Бүгінде құны шамамен 10,2 трлн теңгені құрайтын ірі индустриялық жобалардың портфелі жасалып, оның аясында 20 мыңнан астам жұмыс орны құрылмақ. Жасақталған жобалар портфелі шикізат бағасының ауытқуларына тәуелділікті азайтуға және нақты өнеркәсіптік өндірісті дамытуға бағытталған.

Ірі жобалар

Жамбыл облысы – «ЕвроХим–Қаратау» ЖШС: Күкірт қышқылы, минералды тыңайтқыштар және өзге индустриялық өнімдерді өндіреді. Инвестиция көлемі – 536 млрд теңге, 1,2 мың жаңа жұмыс орны. Жобаның жылдық қуаты – 800 мың тонна. Келесі жылы пайдалануға беріледі.

Түркістан облысы – «Састөбе химиялық кешені» ЖШС: Каустикалық сода, ПВХ және түрлі ілеспе материалдар өндіруді жолға қояды. Инвестиция көлемі – 153,9 млрд теңге, 940 жаңа жұмыс орны. Өндіріс жылына 100 мың тонна каустикалық сода, 120 мың тонна ПВХ, 200 мың тонна кальций карбиді және 400 мың тонна әк шығаруды жоспарлап отыр. Жоба 2027 жылы іске қосылады.

БҚО –  Qazaq Kalium Ltd: Калий тұздарын өндіретін ірі байыту кешені салынады. Инвестиция көлемі – 1,2 трлн теңге, 4 мың адам жұмыспен қамтылады. Жыл сайын 1,5 млн тонна калий тыңайтқышы өндірілмек. Іске қосылуы 2027 жылға жоспарланған.

Түркістан облысы –  Taiqonyr Qyshqyl Zauyty  ЖШС: Күкірт қышқылы зауыты салынады. Инвестиция көлемі – 113,5 млрд теңге, 274 жаңа жұмыс орны ашылады. Жылдық өндіріс қуаты – 800 мың тонна. Зауыт 2027 жылы пайдалануға беріледі.

Қарағанды облысы –  Qarmet  АҚ: Жаңа болат өнімдерін шығару арқылы өндірісін ұлғайтуда. Инвестиция көлемі – 1,6 трлн теңге, 1,9 мың адам жұмыспен қамтылмақ. Жыл сайын 5 млн тонна болат өндіріледі. Өндіріс 2028 жылы іске қосылмақ.

Қостанай облысы – «ССКӨБ» АҚ: Ыстықтай брикеттелген темір өндіретін зауытының I кезеңі 2028 жылы іске қосылды. Инвестиция көлемі – 920 млрд теңге, 1 мың жаңа жұмыс орны ашылды. Зауыт жылына 2 млн тонна өнім шығарады.

Сонымен қатар  Мемлекет басшысының шикізатқа тәуелді емес секторға, қосымша құн мен тұрақты жұмыс орындарын беретін жобаларға назар аудару тапсырмасы аясында Үкімет шетелдік инвесторларды өңдеу, металлургия, химия және материалдық өндіріс салаларына тартуды белсенді жүргізуде.

«Үкімет оң инвестициялық климатты қамтамасыз ететін бірқатар шара қабылдауда. Квазимемлекеттік сектордағы қаржы тетіктерін тарту арқылы жобаларды қаржыландыруға қолдау көрсетіледі. Мәселен, 2022 жылдан бері "аралас қаржыландыру" қағидатын қоса алғанда, экономиканың түрлі секторларында 116 жобаны жүзеге асыруға 700 млрд теңгеден астам қаржы бөлінді. Биыл және алдағы екі жылда іске қосылатын жобалардың есебінен 30 мыңнан астам тұрақты жұмыс орнын құру жоспарлануда», – деді Өнеркәсіп және құрылыс вице-министрі Олжас Сапарбеков.

Шетелдік инвесторлардың қатысуымен шамамен 5,7 трлн теңге көлеміндегі 20 ірі жобадан тұратын портфель жасақталды. Бұл жобалар аясында 11 мыңнан астам жаңа жұмыс орны ашылады. Мұндай жобалардың көбі Жамбыл облысында – 5 жоба, ал Павлодар облысында – 4 жоба орналасқан. Инвестиция көлемі бойынша Жамбыл облысы – 1,47 трлн теңге, Павлодар облысы – 1,02 трлн теңге, Қостанай облысы – 920 млрд теңге.

Ірі индустриялық жобаларды іске асыру Қазақстан үшін жаңа мүмкіндіктер мен нақты нәтижелер әкеледі. Олар өнеркәсіп саласының дамуына серпін беріп, халықты жұмыспен қамту деңгейін арттырады және экспорт әлеуетін күшейтеді. Осылайша, индустриялық жобалар елдің экономикалық тұрақтылығы мен ұзақмерзімді дамуының кепілі болып отыр.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.