Жапония Украинаға қару жарақ жеткізу бағдарламасына қосылмақ БАҚ

АСТАНА, 10 ақпан – Sputnik. Жапония НАТО аясындағы Украинаға көмек көрсету бағдарламасына қосылатынын жақын арада жарияламақ. Бұл туралы NHK телеарнасы хабарлады.

Бағдарлама АҚШ-та қару-жарақ пен әскери жабдық сатып алып, оны Украинаға жеткізуді көздейді. Алайда Жапония адамды өлтірмейтін жабдықтарды – радарлар, оқ өткізбейтін кеудешелер және өзге де қорғаныс құралдарын ғана сатып алмақ. Жапон тарапы бұл ниеті туралы НАТО өкілдері мен Украинаға алдын ала хабар берген.

Жапония үкіметінің бас хатшысы Минору Кихара БАҚ-тағы ақпараттың дұрыстығына қатысты нақты жауап бермеді. Оның айтуынша, "қазіргі уақытта Жапония мен НАТО арасында аталған бағыт бойынша нақты келісім жоқ". Бұл ресми келісім әлі жасалмағанын білдіруі мүмкін. Дегенмен, бұқаралық ақпарат құралдарында Жапонияның бағдарламаға ресми түрде қосылғаны емес, жақын арада қосылатыны жайлы айтылған.

АҚШ-тан қару-жарақ сатып алып, оны Украинаға жеткізуге арналған НАТО бағдарламасы өткен жылдың шілде айында НАТО Бас хатшысы Марк Рютте мен АҚШ президенті Дональд Трамптың кездесуі барысында келісілген. Бағдарламаға НАТО-ның шамамен 20 елі, сондай-ақ альянсқа мүше емес Австралия мен Жаңа Зеландия да қосылған.