Польшаның қорғаныс министрі Украинаға арналған қару жарақ жайында айтты

АСТАНА, 16 қазан - Sputnik. НАТО елдерінің ерікті жарналары арқылы тез қару-жарақ жеткізуді көздейтін Prioritized Ukraine Requirements List (PURL) бастамасына Польша қазір қатысқысы келмейді, деп мәлімдеді Польшаның ұлттық қорғаныс министрі Владислав Косиняк-Камыш.

"Польша Украинаға америкалық қару-жарақ сатып алуды қарастыратын PURL бағдарламасына қатысатынын әзірге жариялаған жоқ. Польша басқа әрекеттерді жүзеге асырып жатыр", - деді Косиняк-Камыш.

Украина қорғаныс министрі Денис Шмыгальдің айтуынша, АҚШ пен НАТО Prioritized Ukraine Requirements List бастамасы арқылы Украинаны қолдаудың жаңа механизмін іске қосты.

Бұл механизмнің мақсаты - АҚШ-тан көп мөлшерде алуға болатын жүйелер мен қару-жарақтарды Украинаға жылдам жеткізуді қамтамасыз ету. Кейін АҚШ қаржы министрі Скотт Бессент АҚШ Киев үшін Еуропа елдеріне қаруды 10 пайыздық үстемемен сататынын айтты.

АҚШ президенті Дональд Трамп мәлімдегендей, АҚШ пен Еуроодақ Киевке америкалық қару-жарақ жіберуге келісті, бұл ретте барлық шығын Еуропаның мойнында болады. Жабдықтардың ішінде тек зымырандар емес, Patriot батареялары да болады.

Ресей Украинаға қару-жарақ жеткізу қақтығысты реттеуге кедергі келтіреді, НАТО елдерін қақтығысқа тікелей тартады деп санайды. Ресей сыртқы істер министрі Сергей Лавров Украинаға арналған қару-жарақ бар кез келген жүк Ресей үшін заңды нысана болатынын айтты.