Жапониядағы БАҚ Қ.Тоқаевтың сапары жайлы жазды

Мемлекет басшысы Қасым-Жомарт Тоқаевтың Токиоға сапары жайында жапондық бұқаралық ақпарат құралдары жарыса жазды.

Жергілікті ірі басылымдар, тіпті аудандық газеттер де Қазақстан туралы мақала жариялап жатыр. Бақ өкілдері Президент сапарын ерекше маңызға ие оқиға деп бағалады. «Бұл Астана мен Токио арасындағы қарым-қатынастың жаңа кезеңінің көрінісі» дейді олар. Журналистер дәл осы сапар арқылы Қазақстан туралы тұрақты саяси салмағы бар, аймақтағы технологиялық және дипломатиялық рөлі нығайып келе жатқан мемлекет ретінде түсінік қалыптасқанын айтады.

Жапония үшін император Нарухитоның шетелдік көшбасшыны жеке қабылдауы ерекше құрмет белгісі саналады. Сондықтан Қасым-Жомарт Тоқаевтың Императорлық сарайдағы кездесуі жапон баспасөзіндегі басты тақырыптардың біріне айналды.

Басылымдар Император мен Президенттің "Татами бөлмесі" деп аталатын ресми залда әңгіме жүргізгені туралы егжей-тегжейлі жазды. Жүздесу барысында нақты экологиялық мәселелерге, соның ішінде су ресурстары мен Каспий теңізінің таяздану мәселелеріне баса назар аударылды.

Nikkei басылымы жазғандай, түскі ас кезінде Президент Қасым-Жомарт Тоқаев БҰҰ-ның су ресурстары мәселелеріне кешенді көзқарасын ұсынатын Қазақстанның ұстанымын түсіндірді. Император Нарухито "су экологиясын" өзінің өмірлік ісіне айналдырған. Осы себепті бұл диалог, басылымдардың пікірінше, дипломатиялық хаттаманың көрінісі ғана емес, екі ел арасындағы терең адами және ғылыми түсіністіктің дәлелі болды.

Қасым-Жомарт Тоқаев пен Жапония Премьер-Министрі Санаэ Такаичидің келіссөздерін де журналистер назардан қалт жібермеді. Жапондық тілшілер бұл кездесуді "энергетикалық серіктестікті жандандыру және жаңа технологиялық көпір орнату" деп сипаттады.

Jiji порталы келіссөздер барысында мұнай-газ саласындағы ынтымақтастық, сондай-ақ маңызды минералдар мен сирек жер металдары бойынша ұзақмерзімді келісімдер сөз болғанын жазады. Тараптар жеткізу тізбегінің қауіпсіздігін арттыру, цифрлық инфрақұрылымды дамыту, жасанды интеллект пен коммуникациялық технологиялар саласындағы өзара іс-қимыл мәселелеріне де көңіл бөлген.

Шетелдік сарапшылар Жапонияның цифрлық даму министрлігі мен Қазақстан арасындағы жасанды интеллект және коммуникация саласындағы жаңа келісімге ерекше қызығушылық танытты. Nikkei бұл бастаманы "Орталық Азиядағы ең әлеуетті технологиялық альянстардың бірі" деп атады.

Токио Орталық Азия елдерімен саммитті алғаш рет ұйымдастырып жатыр. Yahoo агенттігі кездесудің табысты болуы негізінен қазақстандық көшбасшының ұстанымына байланысты болатынын атап өтті.