Жарыстан жүлделі оралған жас сарбаздар

«Айбын-2026»: Жеңіс жолы

Ақмола облысының Щучинск қала­сында әскери мектеп-лицейлер мен әскери оқу орындары арасында өткен халықаралық додада Сабыр Рахымов атындағы әскери колледж үздік шығып, бірінші орынды жеңіп алды. Ал облыс­тар мен республикалық маңызы бар қалалардың әскери-патриоттық клубтары арасындағы сайыста Шымкент қаласының мектеп оқушыларынан құралған «Сұңқар» командасы жалпыкомандалық есепте екінші орынға ие болды.

Жеңімпаздарды қарсы алу рәсіміне ата-аналар, жастар ұйымдарының өкілдері, білім беру саласының қызметкерлері, әскери құрылымдардың басшылығы мен ардагерлер қатысты. Сонымен қатар қала әкімдігі, Қорғаныс істері жөнін­дегі департамент, әскери колледж ұжымы, гарнизон әскери қызметшілері мен Қазақстан Қарулы күштерінің ардагерлері жеңімпаз жастарға құрмет көрсетті. Әскери оркестрдің сүйемелдеуімен өткен салтанатты іс-шара жас сарбаздардың жадында ұзақ сақталатын ерекше сәттердің біріне айналды.

Айта кету керек, халықаралық әскери-патриоттық жиынға Қазақстанмен қатар шетелдерден келген 64 команда қатысты. Бәсекесі жоғары додада шымкенттік жастар өздерінің әскери даярлығының, ұйымшылдығының және жауынгерлік рухының жоғары деңгейде екенін дәлелдей білді. Темірдей тәртіп пен тыңғылықты дайындықтың арқасында олар үздіктер қатарынан көрінді.

Сабыр Рахымов атындағы әскери колледждің курсанты Ернұр Өмірәлі бұл жеңістің оңайлықпен келмегенін айтады.

– Жарыста колледжіміздің намы­­сын абыроймен қорғап, жалпы­командалық есепте бірінші орынды иелендік. Осы нәтижеге жету үшін ұзақ уақыт бойы жүйелі дайындалдық. Түрлі спорттық жарыстарға қатысып, әскери шеберлігімізді шыңдадық. Соның нәтижесінде төрт бірдей байқауда бірінші орын алып, жалпы есепте көш бастадық, – дейді ол.

– Жарыс өте жоғары деңгейде ұйымдас­тырылды. Қатысушылардың барлығы мықты дайындықпен келгені бірден байқалды. Сондықтан сайыс басталар алдында аздап толқығанымыз рас. Өйткені халықаралық деңгейдегі мұндай додаға әр елдің, әр өңірдің ең үздік командалары қатысады. Соған қарамастан, намысты қолдан шығармауға бар күшімізді салдық.

Бізге ата-аналарымыздың, ұстаздары­мыз­дың және колледж ұжымының арт­қан сенімі ерекше жігер берді. Жарысқа атта­нарда айтқан ақ тілектері мен жүрек­жарды лебіздері рухымызды көтеріп, жауап­кершілікті бұрынғыдан да терең сезінуге ықпал етті. Оның үстіне бұл тек колледждің емес, ел намысы сынға түсетін халықаралық жарыс болды. Сондықтан Қазақстанның абыройын биік ұстау әрқайсымыздың басты мақсатымызға айналды.

Әрине, жеңіске жету үшін жалғыз намыс жеткіліксіз. Мұндай деңгейдегі жарыстар тыңғылықты әрі жан-жақты дайындықты талап етеді. Сондықтан жарыс өтетіні белгілі болған сәттен бастап жүйелі жаттығуларға кірістік. Әскери-патриоттық сайыстарда ең алдымен физикалық дайындық сыналады. Осыған байланысты спорттық жаттығуларға ерекше көңіл бөлдік. Белтемірге тартылып, күш-қуатымызды арттырдық, төзім­ділігімізді шыңдадық.

Сонымен бірге әскери колледждің курсанты тек спортпен шектелмеуге тиіс. Болашақ сарбаз әскери тактиканы жетік меңгеріп, қару-жарақ пен әскери техниканы кәсіби деңгейде игеруі қажет. Осы талаптарды орындау үшін тактикалық оқу-жаттығуларға белсенді қатысып, тәжірибемізді молайттық.

Біз тек физикалық емес, психологиялық тұрғыдан да тыңғылықты дайындалдық. Себебі кез келген жарыста ішкі қобал­жуды жеңе білу – табысқа жетудің ма­ңызды шарттарының бірі. Егер адам бойын­дағы үрейді жеңе алмаса, бар білге­нінен жаңылып қалуы әбден мүмкін. Сон­дықтан жаттықтырушыларымыз бен тәлім­герлеріміз бізді ең алдымен психо­логиялық тұрғыдан шыңдауға ерекше көңіл бөлді. Халықаралық жарыстарда өте мықты қарсыластарды көргенде де сабыр сақтап, өз мүмкіндігіңе сенуді үйретті. Бұл дайындықтың пайдасын жарыс барысында анық сезіндік.

«Айбын-2026» біз үшін үлкен тәжірибе мектебі болды. Осындай сындарда шың­далған жас сарбаз ретінде алдағы жарыс­тарда да жеңіс тұғырынан көрінуге күш саламыз. Ең бастысы – еліміздің сенімін ақтап, Қазақстанға адал қызмет ету. Мен үшін бұдан асқан мәртебе жоқ, – дейді Ернұр Өмірәлі. 

Темірдей тәртіп пен тынымсыз жаттығу

Бүгінде Сабыр Рахымов атындағы әскери колледждің мәртебесі бұрынғыдан әлдеқайда жоғары. Бұрын әскери мектеп ретінде жұмыс істеген оқу орны бүгінде кәсіби әскери мамандар даярлайтын колледжге айналды. Мұнда білім алған түлектер оқуын сержант әскери шенімен аяқтап, нақты әскери мамандық иесі ретінде түлеп шығады. Мемлекет ұсынған жеңілдіктерге сәйкес колледж түлектері жоғары оқу орындарының екінші курсына тегін қабылдана алады немесе алған мамандығы бойынша әскери бөлімдерде сержант ретінде қызметке орналасуға мүмкіндік алады.

Колледжде курсанттардың жан-жақты әскери даярлығына ерекше көңіл бөлі­неді. Қоян-қолтық ұрыс, атыс дайындығы, әскери тактика мен жауынгерлік ма­шықтарды меңгеру оқу үдерісінің негізгі бағыттарының бірі саналады. Нәтиже­сін­де, бұл оқу орнын тәмамдаған жастар әскери қызметтің кез келген талабына бейімделген, кәсіби даярлығы жоғары маман болып қалыптасады.

Қазіргі таңда мұнда үш әскери мамандық бойынша білім беріледі. Кол­ледж түлектері мотоатқыштар бөлім­шелерінде әскери техниканы басқару, танк жүргізу, сондай-ақ радиациялық, химиялық және биологиялық қорғау бөлімшелерінде қызмет атқару бағыттары бойынша даярланады.

Сонымен бірге қазіргі заманғы әскери қимылдардың сипаты түбегейлі өзгеріп келеді. Соғыс жүргізудің дәстүрлі тәсілдері жаңа технологиялардың ықпалымен жаңарып, әскери тактика да уақыт талабына сай түрленуде. Әлемдік тәжірибе көрсетіп отырғандай, бүгінде әскери басымдық тек ауыр қару-жарақтың санымен емес, жоғары технологиялық мүмкіндіктермен айқындалады.

Әсіресе ұшқышсыз ұшу аппарат­тары­ның рөлі жылдан-жылға артып ке­леді. Заманауи әскери дрондар барлау жұ­мыстарын жүргізуге, нысаналарды дәл анықтауға және әскери операциялардың тиімділігін арттыруға кеңінен қолданылуда. Қазіргі әскери қақтығыстардың тәжірибесі бұл технологиялардың ұрыс даласындағы шешуші факторлардың біріне айналғанын көрсетті.

Осыны ескерген Сабыр Рахымов атын­дағы әскери колледж де оқу бағдарламасын заман талабына сай жетілдіруде. Алдағы уақытта оқу орнында әскери дрондарды басқару мен оларды тактикалық мақсатта тиімді қолдануды үйрететін арнайы оқу кабинетін ашу жоспарланып отыр. Мұндағы басты мақсат – жас сарбаздарды жаңа буын әскери технологияларды меңгерген, кәсіби білімі жоғары әрі заманауи ұрыс жағдайында тиімді әрекет ете алатын әскери маман ретінде даярлау.

Өз кезегінде қала намысын қорғаған «Сұңқар» әскери-патриоттық клубының мүшелері де халықаралық додада жоғары нәтиже көрсетті.

Команда мүшесі Асылайым Тәтіш бұл жеңістің артында ұзақ дайындық пен қажырлы еңбек жатқанын айтады.

– Осындай халықаралық жарыста туған қаламның намысын қорғау мен үшін үлкен мәртебе. Бұл жетістікке бірнеше ай бойы жүргізілген жүйелі дайындықтың, тынымсыз жаттығулардың және темірдей тәртіптің арқасында қол жеткіздік. Ең бастысы – бізге сенім артқан тәлімгерлеріміздің үмітін ақтай алғанымыз. Алдағы жарыстарда бұдан да жоғары нәтижеге жету үшін аянбай еңбек етемін.

Ел қорғау – тек ер азаматтардың ғана міндеті емес. Қазақ тарихында ел басына күн туған шақта ерлермен бірге қолына қару алып, Отанын қорғаған батыр қыздар аз болмаған. Сақ дәуіріндегі Томирис патшайымнан бастап, Екінші дүниежүзілік соғыстағы Мәншүк Мәметова мен Әлия Молдағұловаға дейінгі батыр аналарымыз біз үшін қайсарлық пен отансүйгіштіктің мәңгілік үлгісі болып қала береді.

Сол себепті мен бала кезімнен әскери сала мен спортқа ерекше қызығып өстім. Қазақ қызының тек отбасының ұйытқысы ғана емес, қажет болған жағдайда қолына қару алып, елін қорғай алатын қайсар тұлға екенін дәлелдегім келеді.

Бұл жарыста әрбір қатысушыға үлкен жауапкершілік жүктелді. Командалық жеңіс ұлдардың ғана емес, қыздардың да табандылығы мен төзімділігіне байланысты болды. Сондықтан біз ешқандай жеңілдік күтпей, жігіттермен бірдей дайындалдық, бірдей жаттықтық.

Мен жастардың әскери-патриоттық қозғалыстарға көбірек қатысқанын қалай­мын. Мұндай жиындар жастардың спортқа қызығушылығын арттырып қана қоймай, олардың тәртіпке, жауапкершілікке және өзін-өзі қорғауға бейімделуіне ы­қпал етеді. Сонымен бірге әскери-спорт­тық үйір­мелер жасөспірімдерді зиянды әдет­терден сақтап, салауатты өмір салтын қа­лып­тастыруға үлкен әсер етеді. Бүгінгі Қазақ­станға дені сау, білімді, тәрбиелі әрі елжанды жастар қажет, – дейді Асылайым Тәтіш.

Жеңіспен оралған шымкенттік жас­тардың қуанышын бөліскен «Жас сарбаз» әскери-патриоттық қоғамдық қозға­лысының төрағасы Еркін Сәбит халық­аралық додадағы нәтиже – жүйелі жұмыс­тың заңды жемісі екенін атап өтті.

Оның айтуынша, қала мектептерінің намысын қорғаған «Сұңқар» командасы 11 бағыт бойынша өткен сайыстарда жоғары шеберлік танытып, жалпыкомандалық есепте жүлделі екінші орынға ие болған.

– Менің түсінігімде патриотизм – жүректен басталатын қасиет. Тәуелсіз Қазақстанның ең басты байлығы – білімді, рухы биік, елін сүйетін жас ұрпақ. Өйткені мемлекеттің болашағы бүгінгі жастардың тәрбиесімен өлшенеді.

Елін сүйетін, жерінің қадірін білетін, ұлттық құндылықтарды құрметтейтін азамат тәрбиелеу – барша қоғамның ортақ міндеті. Осы жауапты міндетті жүзеге асыруда «Жас сарбаз» әскери-патриоттық қозғалысының орны ерекше. Бұл ұйым әскери даярлықтың ғана емес, азаматтық жауапкершіліктің, көшбасшылықтың, тәртіп пен рухани кемелденудің үлкен мектебіне айналды.

Мұнда жасөспірімдер Отан қорғау­дың қасиетті парыз екенін терең түсініп қана қоймай, нағыз азаматқа тән мінез-құлықты, жауапкершілікті және көшбас­шылық қасиеттерді бойына сіңіреді. 2018 жылы Қазақстан Республикасы Қор­ғаныс министрлігінің бастамасымен құрылған «Жас сарбаз» қозғалысы бүгінде еліміздегі ең ірі әскери-патриоттық ұйымдардың біріне айналып отыр. Оның басты мақсаты – жастардың бойында қазақ­стандық патриотизмді қалыптастыру, әскери қызметтің беделін арттыру және болашақ Отан қорғаушыларын жан-жақты тәрбиелеу, – деді Еркін Сәбит.

Оның айтуынша, бүгінде «Жас сарбаз» қозғалысы еліміздің барлық өңірін­де табысты жұмыс жүргізіп, мыңда­ған жасөспірімді бір мақсатқа – елге адал қызмет етуге жұмыл­дырып отыр. Қозғалыстың негізгі ұстанымы – «Отанға қызмет ету – абыройлы міндет». Осы қағидат негізінде ұйым жастардың бойында туған жерге сүйіспеншілік, мемлекеттік рәміздерге құрмет, әскери қызметке жауапкершілікпен қарау, тәртіп пен ұйымшылдық, көшбасшылық қабілет, салауатты өмір салты, ұлттық рух пен елдік сананы қалыптастыру бағыттарын жүйелі түрде дәріптеп келеді. Бұл ұстанымдар жас ұрпақ бойында нағыз қазақстан­дық патриоттың бейнесін қалыптастыруға негіз болып отыр.

Қозғалыстың қызметі еліміздің барлық өңірін қамтитын бірыңғай жүйе арқылы жүзеге асырылады. Оның құрамына респуб­ликалық қоғамдық бірлестік, облыс­тық және республикалық маңызы бар қала­лардағы филиалдар, аудандық және қалалық бөлімшелер, мектептердегі әскери-патриоттық клубтар, «Жас сарбаз» мамандандырылған сыныптары, сондай-ақ әскери-қолданбалы спорт секциялары мен үйірмелер кіреді. Осындай құрылымның арқасында әскери-патриоттық тәрбие ел аумағында ортақ мақсат пен жүйелі бағыт негізінде жүргізіліп келеді.

«Жас сарбаздың» жұмысы тек әс­кери дайындықпен шектелмейді. Бұл – жас­тардың жан-жақты дамуына бағытталған ауқымды тәрбие алаңы. Қозғалыс аясын­да әскери-патриоттық форумдар, далалық оқу-жаттығу жиындары, әскери бөлімдерге таным­дық экскурсиялар, саптық және так­тикалық дайындық сабақтары, әскери-қолданбалы спорт жарыстары, тарихи-танымдық кездесулер, ардагерлермен тағылымды жүздесулер және респуб­ликалық әрі халықаралық деңгейдегі әскери-патриоттық жобалар тұрақты түрде өткізіліп тұрады. Мұндай іс-шаралар жастарды төзімділікке, тәртіпке, өзара сенімге және командалық әрекетке баулиды.

«Жас сарбаз» – ертеңгі ел қорғаны

Шымкент қалалық филиалы – өңір­­дегі әскери-патриоттық тәрбиені жү­йелі түрде жүзеге асырып отырған белсенді құрылымдардың бірі. Оның ­басты мақсаты – жас ұрпақ бойына елге сүйіспеншілік, жауапкершілік, ұлттық рух және азаматтық ұстаным қалыптастыру. Бүгінде филиал Шымкент қаласының білім басқармасымен, қорғаныс істері жөніндегі департамент, әскери бөлімдер, құқық қорғау органдары, төтенше жағдайлар қызметі, ардагерлер ұйымдары және өзге де мемлекеттік құрылымдармен тығыз ынтымақтастықта жұмыс істейді.

Қала мектептерінде құрылған әскери-патриоттық клубтар мен мамандан­дырылған сыныптарда 5 мыңнан астам оқушы тәрбиеленіп келеді. Олар алғашқы әскери дайындықпен қатар көшбасшылық, жауапкершілік, тәртіп, батылдық және өзара сыйластық секілді өмірлік маңызды қасиеттерді меңгеріп келеді. Осындай жүйелі жұмыстың нәтижесінде қаладағы әскери-патриоттық тәрбие тұрақты түрде дамып отыр. Сондықтан да әрбір жетістік – жүйелі еңбектің жемісі.

Шымкенттік жас сарбаздар респуб­ликалық және халықаралық деңгейдегі жарыстарда тұрақты түрде жоғары нәтиже көрсетіп келеді. Соның айқын дәлелі – биыл Ақмола облысында өткен «Айбын» XII халықаралық әскери-патриоттық жастар жиынында Шымкент қаласының «Сұңқар» командасының жалпыкомандалық есепте 2-орын иеленуі. Бұл жеңіс – кәсіби дайындықтың, қажырлы еңбектің және елге деген сүйіспеншіліктің жарқын көрінісі.

«Жас сарбаз» жай ғана қоғамдық қозғалыс емес. Бұл – елін сүйетін ұрпақ­ты тәрбиелейтін рухани мектеп, тәртіп пен жауапкершіліктің, ерлік пен елдік сананың алтын бесігі. Шымкент қалалық филиалы осы игі миссияны абыроймен атқарып, жастардың бойына патрио­тизмді, адамгершілікті, ұлттық рухты және Отан алдындағы жауапкершілікті сіңіру бағытында жүйелі еңбек етіп келеді. Бүгінгі жас сарбаз – ертеңгі ел қорғаны. Сондықтан олардың бойына сіңірілген әрбір ізгі қасиет, берілген әрбір сапалы тәрбие – елдің қауіпсіз әрі жарқын болашағына салынған берік негіз, – деді қозғалыс жетекшісі.

Айта кету керек, «Айбын» – жастар арасындағы ең ірі халықаралық әскери-патриоттық жиындардың бірі. Он жылдан астам уақыт бойы 14 пен 17 жас аралығындағы жасөспірімдер бұл алаңда әскери тәртіпке, жауапкершілікке және отансүйгіштікке тәрбиеленіп келеді. Биылғы дода Ақмола облысындағы Шоқан Уәлиханов атындағы әскери колледж базасында ұйымдастырылды.

Жарысқа Қазақстанмен қатар Қырғыз­стан, Өзбекстан, Ресей және Әзербай­жан елдерінен мыңға жуық жас өрен қатыс­ты. Қатысушылар әскери-спорттық, зият­керлік және шығармашылық бағыттар бойынша сынға түсті. Биыл алғаш рет бағ­дарламаға жүзу мен жасанды интеллект дағдыларын меңгеру кезеңдері енгізілді.

Жарыс барысында белтемірге тартылу, әскери қорғаныс жиынтығын кию, пневматикалық қарудан ату, граната лақтыру, АК-74 автоматын бөлшектеу мен жинау, сондай-ақ қысқа және ұзақ қашық­тыққа жүгіру сияқты әскери-қолданбалы сынақтар өткізілді.

Сайыстың жабылу рәсіміне Қазақстан Республикасының Президенті ­Қасым-Жомарт Тоқаев арнайы қатысып, жас сарбаздарға жүрекжарды тілегін білдірді. Мемлекет басшысы жастармен кездесіп, пікір алмасып, естелік суретке түсті. Бұл сәт жас өрендер үшін өмірлік маңызы бар тарихи оқиғаға айналды.

Ал Шымкенттің мерейін асқақтатқан бұл жеңіс – әскери-патриоттық тәрбие­нің нақты нәтижесі, сондай-ақ жас сарбаз­дардың табандылығы мен бірлігінің айқын көрінісі болып қала бермек.