Жасампаз жобалар бірыңғай жүйеде

Сурет: bilim.expert

Бірегей платформа жеке және заңды тұлғалардың пайдалануына арналған. Олар­дың қатарында авторлар, дизайнерлер, сурет­шілер, фотографтар, музыканттар, қол­өнер­шілер және өзге де креаторлармен қатар, шығар­­ма­шылық студиялар, бір­лестіктер, агенттіктер, продюсерлік орта­лық­тар мен креативті индус­­трия саласында жұмыс істей­тін ұйымдар бар.

Енді креативті индустрия өкілдері www.qazaqculture.com порталындағы «QazaqCreative» бөлімі арқылы тіркеліп, жеке кабинетін ашып, платформадағы цифрлық сервистерді пайдалана алады. Тіркеуден өткен пайдаланушылар өз профилін басқаруға, жобалары мен көрсететін қызметтері туралы ақ­парат орна­лас­тыруға, хабарламалар алуға және мем­ле­кет­тік қолдау бағдарламаларына қаты­су­ға өтінім береді.

«QazaqCreative» платформасында грант бағдарламалары, жобаларды қаржыландыру тетіктері, білім және акселерациялық бағ­дар­ламалар, консультациялық, сарапта­ма­лық, ақпараттық әрі цифрлық қолдау құралдарына дейінгі ақпарат ұсынылады. Сондай-ақ пайдаланушылар байқауларға, питчинг сессияларына, форумдарға, көрмелерге және өзге де салалық іс-шараларға қатыса алады. Цифрлық қосымша еліміздегі креаторлардың өнімдері мен қызметтеріне қызығушылық танытқан көпшілікке де арналған.

Айта кетейік, Мемлекет басшысы Қасым-Жомарт Тоқаевтың тапсырмасына сәйкес Мәдениет және ақпарат министрлігі креатив­ті индус­трияны дамыту және саланы мем­­лекет­тік қолдау тетіктерін жетілдіру жұ­мысын жалғас­тырып келеді. Осыған байланыс­ты «Креативті индустрияға жататын эконо­ми­­ка­лық қызмет түрлерінің тізбесін бекі­ту туралы» бұйрығына өзгерістер енгізіліп, креа­тивті индустрияға кіретін экономикалық қыз­мет түрлерінің (ЭҚЖЖ) саны 43-тен 53-ке дейін ұлғайды.

Тізімге «Веб-порталдар қызметі», «Радио­хабар тарату», «Мәдениет саласындағы білім беру», «Жарнама агенттіктерінің қызметі», «Кі­тап басып шығару», «Өзге де баспа қызметі», «Кинофильмдер, бейнефильмдер мен теле­ви­зиялық бағдарламаларды тарату қыз­меті», «Кинофильмдерді көрсету қызметі», «Өзге де полиграфиялық өндіріс», «Тығыннан, сабан­нан және өруге арналған материалдардан бұйымдар өндіру» қызмет түрлері енгізілді.