Жасанды интеллект арқылы тау кен өндірушілердің жұмысы жеңілдемек

Бүгінде Қазақстанның өнеркәсіптегі цифрлық трансформация жаңа кезеңге өтті. Өйткені осы күні еліміздің 11 отандық компаниясы жасанды интеллектті қолданып отыр. Соның арқасында олар 40-тан астам жобаны жүзеге асырды.

Соның бірі – алтын өндіруші Solidcore Resources компаниясы. Ірі кәсіпорындардың өндірістік үдерісіне жасанды интеллектінің кең мүмкіндігін енгізу бойынша 2025-2026 жылдарға арналған Жол картасы аясында төрт элемент енгізді. Бұл – Solidcore Resources кәсіпорындарында тау-кен саласындағы қауіпсіздік пен өндіріс тиімділігін арттыруға бағытталған.

Жобаның алғашқы кезеңі Абай облысындағы Бақыршық тау-кен өндіру кәсіпорнында автоматтандырылған медициналық тексеру жүйесі (АМТЖ) қосылды. Оның үздіксіз жұмыс істеуіне ауданы 100 шаршы метрлі заманауи медициналық пункт салынды. Қазір қызметкерлерді ауысым алдындағы медициналық тексеру бірнеше минутта жүргізіледі. Жасанды интеллект жүйесі арқылы қызметкердің қан қысымы көтерілсе, қатты шаршаңқылығы немесе масаңдығы анықталса, оған қауіпті жұмыс атқаруға автоматты түрде рұқсат етілмейді.

– Қауіптің алдын алсақ, ең алдымен қызметкерлеріміздің өмірін сақтаймыз. Сонымен қатар, бюджет қаржысы да үнемделеді. Өйткені біз қаражатты төтенше жағдайдың салдарын жоюға емес, компанияның дамуына жұмсамақпыз, – дейді Solidcore Resources кәсіпорнының өкілі.

Solidcore Resources компаниясына кіретін Қостанай облысындағы Варварин хабы мен Павлодар өңіріндегі Ертіс гидрометаллургиялық комбинатында да (ЕГМК) жасанды интеллектке негізделген тағы екі жүйені іске қосылмақ.

Олар – жұмысшыны нүктелік және аймақтық позициялау жүйесі және оператордың цифрлық ассистенті. Бірінші жүйе әр қызметкердің орналасқан жерін нақты уақыт режимінде бақылап, қауіпті аймақта қатер туындаса бірден ескертеді. Екіншісі –  оператордың цифрлық ассистенті, яғни қызметкерлерге шешім қабылдау кезінде интеллектуалдық қолдау көрсетеді.

Solidcore Resources кәсіпорнына төртінші жоба жыл соңына дейін енгізіледі. Жасанды интеллект арқылы пайдалы қазбаларды байыту үдерісін бақылай отырып, металл мен реагенттер шығынын азайтуға мүмкіндік береді.