Жетісу облысында жедел жәрдем қызметі қашан реттеледі?

Жетісу облысындағы Қоңырөлең ауылының тұрғындары жедел-жәрдем қызметі тәулік бойы жұмыс істесе дейді. Себебі жаздан бері елді мекендегі бөлімше таңертеңнен қас қарайғанша ғана қызмет көрсететін болған. Ал түнгі уақытта басы ауырып, балтыры сыздағандар 70 шақырым жерден келетін жедел-жәрдемді сарыла тосуға мәжбүр. 

Қоңырөлең ауылдық округінде бес мыңнан аса адам тұрады. Әкімдікке жиылған тұрғындар: «Мамыр айынан бері алғашқы медициналық көмек алуымыз қиындады», - деп отыр. 

Сәкен Әлпешов, Қоңырөлең ауылының тұрғыны:

- Жедел-жәрдем деген ауамен бірдей болып отыр. Үлкен ұлағатты сөзіміз бар: «Айыл тұрманның батқанын иесі білмес, ат білер». Қарап отырсаңыз ауырған адамдар ғана біледі. Құдай ауыртпасын. Біз енді өзіміз ауырғаннан кейін Көкталдан шақыртқан жедел-жәрдеміміз көрші көшеде жүр. Ал біз бер жағында тұрмыз. Сол кезде ауырып жатқан адам кетіп қалса жағдай қандай болмақ? Кімнен не сұраймыз?

Жедел-жәрдем қызметін қазір мобильді бригада алмастырып отыр. Алайда олар бұрынғыдай тәулік бойы емес, таңғы сегізден кешкі сегізге дейін жұмыс істейді. 

Қатира Құрманбекова, Коңырөлең ауылының тұрғыны:

- Бұрын бізде төрт фельдшер болған. Жедел-жәрдем болған. Соның бәрін халықтың саны аз деп алып тастады ма, әйтеуір алып тастады. Бізге керегі жедел-жәрдем, халыққа қайтарып берсе екен. Бұрыңғыдай аурухана қызметкерлері қалтқысыз қызмет жасаса екен. 

Қоңырөлең ауылдық округінен түсетін шақыртуларға облыстық жедел-жәрдем станциясының қызметкерлері сараптама жасаған.  

Савелий Пак, облыстық жедел жәрдем станциясының басшысы:

- Қоңырөлеңнен тәулігіне екіден бес шақыртуға дейін түседі. Соған бола ол жерде реанимобиль бригадасын ұстаудың қажеттілігі жоқ. Шақыртуларды жіктейтін болсақ ешқайсысы шұғыл түрде көмек көрсететін бірінші санатқа жатпайды. Көбіне екінші, үшінші санаттағы шақырту. Министрліктің бұйрығына сәйкес 10 мың адамға бір бригада есептелген.   

«Еліміздегі жедел-жәрдем қызметінің жұмысына биыл өзгеріс енгізілді», - дейді облыстық Денсаулық сақтау басқармасының басшысы Асқар Садықов. Сала жетекшісі енді науқастардың жағдайы төрт санат бойынша тіркеуге алынады. Айтуынша, алғашқы үшеуіне жедел-жәрдем станциясының мамандары ем-дом жасаса, ал төртінші санаттағы шақыртуларға мобильді бригадалар барады.

Асқар Садықов, облыстық Денсаулық сақтау басқармасының басшысы:

- Емханаларға мобильді бригадалардың енгізілуімен жұмыс уақыты ғана өзгерді. Қазір мобильді топтар таңғы сегізден кешкі сегізге дейін жұмыс істейді. Ал 20:00-ден кейінгі шақыртулардың бәріне жедел жәрдем станциясы қызмет көрсетеді. 

Жетісу облысындағы жедел-жәрдем станциясына тәулігіне 1200-дей шақырту түседі. Науқастанғандарға 67 бригада шұғыл медициналық көмек көрсетеді.

Авторлары: Шыңғыс Қалиден, Жеңіс Әбдірешов, Айгүл Ғазизулина