Атырау облысында жедел жәрдем станциясы 25 көлікпен толықты

Атырау облысының жедел медициналық жәрдем станциясы су жаңа 25 көлікпен толықты. «Теңізшевройл» компаниясы осындай тарту жасады.

Заманауи жабдықтармен қамтамасыз етілген әр көлік шақыртуларға дер кезінде жетіп, науқастарға шұғыл көмек көрсетуге мүмкіндік береді.

Әр науқасқа уақытылы жетіп, дер кезінде медициналық көмек беруде жедел жәрдем көліктерінің маңызы зор. Әр бригада мен науқастардың қауіпсізігін арттырып, сала мамандарының еңбек жағдайын жақсарту мақсатында «Теңізшевройл» компаниясы бүгін облыстық жедел медициналық жәрдем станциясына 25 көліктің кілтін табыстады.

Билли Лакоби, «Теңізшевройл» ЖШС Бас директоры:

- Бүгінгі іс-шара – жай ғана көліктерді тапсыру емес, қоғамның денсаулығы, қауіпсіздігі мен әл-ауқатының жақсаруына қосып отырған үлесіміз. Медициналық көмек көрсету жылдамдығының адам жанын аман алып қалудағы маңызы зор. Сондықтан әр көлік заманауи медициналық құралдармен жабдықталған. Жедел жәрдем көліктері мұқтаж жандарға тезірек жетіп, оларды аман сақтап қалуға септігін тигізеді деген ойдамыз.

Атырау облысында 70-ке тарта жедел жәрдем бригадасы жұмыс істейді. Облыстық станцияға тәулігіне 1000-нан астам шақырту түседі.

Қайсар Абдалиев, Денсаулық сақтау басқармасының басшысы:

- Ауылдық жерлерде де, аудан орталықтарында және үлкен елді мекендерде де қосалқы станциялар бар. Сол қосалқы станциялардағы ескірген көліктерді жаңартатын боламыз. Жаңа көліктер іске қосылғаннан кейін тозу деңгейі төмендейтін болады. Демеушілерге алғысымызды білдіреміз.

«Теңізшевройл» компаниясы дәстүрлі түрде әлеуметтік бастамаларды қолдауға баса назар аударады. 1993 жылдан бері компания өңір халқы мен түрлі сала қызметкерлеріне арналған әлеуметтік жобаларды қаржыландыруға 3,6 миллиардтан астам доллар бөлген.

Авторлары: Асланбек Шығыр, Айбек Байзақов